Sulejman Kierymaŭ pradaść 21,75% akcyj rasijskaha kalijnaha hihanta «Urałkalij» rasijskamu miljarderu Michaiłu Procharavu. Pra heta havorycca ŭ paviedamleńni inviestycyjnaha hihanta «Oneksimhrup», jaki naležyć Procharavu.
Procharaŭ naležyć da hrupy bahatyroŭ, jakija zrabili kapitał u 1990-ja. Jon taksama ŭznačalvaje rasijskuju libieralnuju partyju «Hramadzianskaja płatforma» i ŭdzielničaŭ u prezidenckich vybarach u Rasii.
Pavodle źviestak ahienctva Bloomberg, u ramkach ździełki «Urałkalij» acenieny na $20 młrd. Zychodziačy z hetaj acenki, 21,75% «Urałkalija» kaštujuć $4,35 młrd. Rynkavaja cana pakieta składała mienš — kala $3,5 młrd.
Prodaž Sulejmanam Kierymavym doli ŭ najbujniejšym vytvorcu kalijnych uhnajeńniaŭ staŭ na paradku dnia paśla razryvu ŭ kancy lipienia adnosinaŭ «Urałkalija» i Biełaruskaj kalijnaj kampanii i aryštu ŭ Biełarusi kiraŭnika «Urałkalija» Uładzisłava Baŭmhiertniera.
Ułady Biełarusi inkryminavali i Kierymavu, i Baŭmhiertnieru złoŭžyvańnie ŭładaj i słužbovymi paŭnamoctvami. Jak čakajecca, źmiena ŭłaśnika asnoŭnaha akcyjaniera «Urałkalija» paspryjaje vyrašeńniu kanfliktu.
Kiraŭnik «Biełaruśkalija» Valeryj Kiryjenka nie viedaje pra mety inviestycyj Michaiła Procharava. «Nie viedaju, ja z Procharavym nie znajomy. I jakija jaho mety i zadačy, ja taksama nie viedaju. Kali heta pasłužyć stabilizacyi rynku i spakoju, to my budziem tolki rady», — cytuje spadara Kiryjenku rasijskaje ahienctva «Prajm».
