Na sustrečy Alaksandra Łukašenki z kiraŭnikami biełaruskich ŚMI 21 studzieni dyrektar Infarmacyjnaj kampanii BiełaPAN Aleś Lipaj padniaŭ pytańnie ab mahčymaści prymianieńnia amnistyi da palitviaźniaŭ.
«Ci padpaduć pad dziejańnie amnistyi, jakaja budzie ŭ 2014 hodzie, palitviaźni? — spytaŭ Lipaj. - Nakolki ja razumieju, prašeńnie ab pamiłavańni ad ich dla hetaha nie patrabujecca. U pryvatnaści, Mikałaj Statkievič — kandydat u prezidenty na vybarach 2010 hoda. Jon atrymaŭ samy surovy prysud z asudžanych za arhanizacyju masavych biesparadkaŭ — šeść hadoŭ, i ŭžo adsiedzieŭ bolš za pałovu terminu, ale navat ludzi, jakija šturmavali Dom urada i bili ŭ im škło, užo vyjšli na svabodu, a Statkievič nie tolki nie ŭdzielničaŭ u takich dziejańniach, ale i nie zaklikaŭ da pahromu. Jon, mabyć, z tych ludziej, chto ŭžo nie stanie prasić ab pamiłavańni navat pad ciskam. Było b u lepšych tradycyjach chryścijanstva i biełaruskaha naroda daravać jamu toje, što jon vystupaŭ z rezkaj krytykaj ułady i ŭdzielničaŭ u arhanizacyi mirnaj akcyi pratestu, jakaja pierarasła ŭ bićcio škła i źbićcio ludziej zusim nie pa jaho voli. Amnistujcie ich, heta dapamoža naładzić dyjałoh ź Jeŭrapiejskim Sajuzam — dyjałoh, jaki, biezumoŭna, u intaresach biełaruskaha naroda, a značyć, pavinien być i ŭ intaresach kiraŭnika dziaržavy».
U adkaz Alaksandr Łukašenka nahadaŭ, što ŭžo nie raz kazaŭ ab isnujučaj u krainie praktycy pamiłavańnia: asudžany pavinien napisać prašeńnie ab pamiłavańni, jakoje budzie razhledžana. «Možaš nie pisać, što ty vinavaty», — dadaŭ kiraŭnik dziaržavy.
Na ŭdakładniajučaje pytańnie Alesia Lipaja, ci značyć heta, što kali Mikałaj Statkievič napiša prośbu ab pamiłavańni, ale tam nie budzie pryznańnia jaho viny, to jaho vyzvalać, Alaksandr Łukašenka adkazaŭ: «Mahčyma, zrobim, ale paradak vykanańnia pavinien być».
Kamientujučy BiełaPAN vykazvańni kiraŭnika dziaržavy, žonka Mikałaja Statkieviča Maryna Adamovič padkreśliła: jaje muž usio roŭna nie budzie pisać prašeńnia. «Jon z razumieńniem stavicca da rašeńniaŭ, jakija prymajuć astatnija ludzi. Ale dla siabie jon na siońniašni dzień hetuju mahčymaść vyklučaje. Ni pry jakich umovach jon hetaha nie zrobić. Pisać ja jamu pra heta nie budu, ja dumaju, da jaho daviaduć heta raniej, čym ja napišu», — skazała Adamovič.
«Nievinavatych nie miłujuć», — dadała jana.
