Kupałaŭski teatr vykłaŭ u prodaž kvitki na sakavik.
Raniej kvitki možna było nabyć u troch kasach teatra (u padziemnym pierachodzie la HUMa, na stancyi mietro «Instytut kultury», a taksama ŭ hałoŭnaj kasie na Enhielsa, 7a, u jakuju pieraŭtvaryli budynak byłoj prybiralni). Usie jany abjadnanyja ŭ ahulnuju sistemu.
Ciapier Kupałaŭski prapanavaŭ doŭhačakanuju navinku.
Kvitki na ŭsie śpiektakli možna zabraniravać u raździełach «Kvitki teatra» i «Kvitki horada» na aficyjnym sajcie. A ciaham dvuch dzion vykupić ich u luboj z troch kas.
Ale patencyjnych hledačoŭ čakajuć składanaści. Naprykład, 22, 23 i 25 sakavika adbudziecca novaja premjera – «Don Žuan» Maljera ŭ pierakładzie Chadanoviča. Kvitki na dva pieršyja pakazy źjavilisia ŭ prodažy 3 lutaha, na treci pakaz – siońnia.
Ale teatr adrazu prapanavaŭ hledačam tolki nievialikuju častku kvitkoŭ. Kudy ž źnikli astatnija? Kasiry Kupałaŭskaha patłumačyli, što kvitki adrazu nie byli dastupnyja dla prodažu, a buduć raspaŭsiudžvacca praz arhanizacyi.
Taki mietad byŭ raspaŭsiudžany ŭ Savieckim Sajuzie. Ale jaho prymianiali tolki ŭ tych kalektyvach, jakija sapraŭdy majuć prablemy z naviedvalnaściu. A voś ubačyć kupałaŭskija śpiektakli, a taksama rekanstrujavany budynak, žadajuć sotni, kali nie tysiačy biełarusaŭ.
Tamu možna z ŭpeŭnienaściu sprahnazavać: trapić u Kupałaŭski ŭ bližejšy čas stanie prablemaj.
Naprykład, na pieršy premjerny pakaz «Don Žuana» možna znajści tolki dva miescy ŭ partery, a taksama bakavyja miescy na bałkonie i bieletažy. Zrešty, na try sakavickija pakazy «Pana Tadevuša» kvitkoŭ amal nie zastałosia.
