Pasoł Josief Šahał byŭ viadomy svaimi adyjoznymi zajavami jašče ŭ Izraili.
Atrymlivaŭ orden z ruk Ilchama Alijeva
Josief Šahał naradziŭsia ŭ Baku (jaho pieršaje imia Vosip Ščohaleŭ), dzie i pražyŭ da 1990 hoda. Byŭ členam KPSS. Byŭ namieśnikam hałoŭnaha redaktara Dziaržaŭnaha kamiteta pa telebačańni i radyjoviaščańni Azierbajdžanskaj SSR.
U 2011 hodzie Šahał z ruk prezidenta Azierbajdžana atrymaŭ orden «Dostłuh» (Družby) — najvyšejšuju ŭznaharodu Azierbajdžana.
Azierbajdžan šmat razoŭ abvinavačvali ŭ parušeńni pravoŭ čałavieka i falsifikacyi vybaraŭ. U krainie za kratami znachodziacca niekalki dziasiatkaŭ palitviaźniaŭ. Pry hetym kraina maje pryvilejavanyja adnosiny ź Izrailem, jaki vybudoŭvaje łancuh sajuźnikaŭ vakoł svajho patencyjnaha praciŭnika — Irana.
Sarvaŭ vizit ministra zamiežnych spravaŭ u Baku
U 2006 hodzie pajezdka Jozefa Šahała na radzimu ŭ Baku skončyłasia vialikim skandałam. Šerah zajavaŭ hetaha čałavieka pryciahnuŭ ŭvahu nie tolki ŭ Izraili i Azierbajdžanie, ale i ŭ Armienii i Iranie. U Tehieranie vykazvańni Šahała navat pačali vykarystoŭvać u svaich metach. Što ž nahavaryŭ deputat?
«Izrail padtrymlivaje spraviadlivuju pazicyju Azierbajdžana ŭ nahorna-karabachskim kanflikcie», — pryčym havaryŭ jon toje, nie jak pryvatnaja asoba, a ad imia ŭsiaho Knieseta. U izrailskich ŚMI mierkavali, što tyja zajavy Šahała mahli paspryjać umacavańniu pazicyj Irana ŭ Armienii.
Sam Josief Šahał adkazvaŭ, što mieŭ mała dypłamatyčnaha dośviedu. Izrail u armiana-azierbajdžanskim kanflikcie aficyjna trymajecca niejtralitetu.
Praz tyja zajavy na niejki čas byŭ adkładzieny vizit ministra zamiežnych spravaŭ Izraila Cypi Liŭni ŭ Baku.
Nazvaŭ deputata Kneseta «kazłom»
Nievialiki pieryjad času Jozef Šahał byŭ deputatam izrailskaha Kneseta (parłamienta). Jon trapiŭ u śpis abranych ad nacyjanalistyčnaj partyi «Naš dom Izrail» u Kneset 17-ha sklikańnia, jaki dziejničaŭ ad krasavika 2006 da kastryčnika 2008. Partyja abapirajecca pieravažna na vychadcaŭ z byłoha SSSR.
Padčas abmierkavańnia deputatami pytańnia hienacydu armianskaha naroda, spadar Šahał nastolki razharačyŭsia, što nazvaŭ deputata Elkina z partyi «Kadzima» «kazłom». Toj mieŭ nieaściarožnaść nahadać, što deputat-niabožčyk ad «Naš dom Izrail» Juryj Štern taksama vystupaŭ za pryznańnie hienacydu armian. «Ty jašče Čechava ŭspomni, kazioł, mordu b tabie nabić treba», — skazaŭ pa-rusku Šahał.
«Tema hienacydu armian — heta adzinaja mahčymaść izrailskim palitykam-marhinałam nahadać pra svajo isnavańnie», — potym skazaŭ Šahał.
Troliŭ žurnalistku Asiu Istošynu
U 2006 hodzie ŭ efiry telekanała RTVi Šahał zatroliŭ žurnalistku Asiu Istošynu. Havorka išła ab uvachodzie partyi «Naš dom Izrail» da šyrokaj kaalicyi. Voś niekatoryja jahonyja vykazvańni z taho intervju.
«Asia, heta psichałohija chatniaj haspadyni… Chopić pieratvaracca ŭ kłasičnych izrailcian».
«Asia, prabačcie, kaniečnie, ale pa-mojmu vy siabie kiepska adčuvajecie, vam treba pryniać vakcynu ad hrypu».
«Mnie nadakučyła vaša demahohija. Asia, davajcie ja vas krychu pavuču, ja viadučy ŭsio ž bolš daśviedčany».
«U vas jość narmalnyja zdarovyja pytańni? Vy mianie sustrakajecie piaćciu pytańniami. U vas inšych papierak bolej niama? Nu zadajcie jakoje-niebudź narmalnaje pytańnie».
«Pasłuchajcie, vy mianie viedajecie. Ja, ja Josief Šahał, ja žurnalist, i ja maju niaščaście vychavać šmat vučniaŭ, u tym liku i niaŭdałych - heta byvaje».
«Vy pamylajeciesia jak zaŭsiody, pa vyznačeńni».
Nie pryznaje najaŭnaści palitviaźniaŭ u Biełarusi
U lutym 2012 Jozef Šahał tolki prybyŭ na pracu ŭ Biełarusi. Padčas intervju BiełaPAN jon skazaŭ, što nie viedaje, ci isnujuć u Biełarusi palitviaźni.
«Ja — hramadzianin Izraila, u nas niama palitviaźniaŭ. Što da Biełarusi, to ja nie viedaju, mnie treba pačytać haziety. Praz paŭhoda ja adkažu na vaša pytańnie, — skazaŭ pasoł. — Ja žurnalist i vydatna viedaju, jak pišucca artykuły. Vy sami byvali ŭ łahierach dla palitviaźniaŭ?»
Sioleta ŭ efiry telekanała RTVi jon paraŭnaŭ biełaruskich palitviaźniaŭ z palestynskimi terarystami.
«Ja nie kažu, što jany nie palitźniavolenyja — ź jakoha boku hladzieć. Z punktu hledžańnia kryminalnaha kodeksa krainy, dzie ich pasadzili, jany kryminalniki. Z punktu hledžańnia Polščy ci Jeŭrasajuza, jany palitźniavolenyja», — skazaŭ izrailski dypłamat.
Na ŭdakładniajučaje pytańnie žurnalistki «a z punktu hledžańnia Izraila?», Šahał adkazaŭ: «Z punktu hledžańnia našaha, jany kryminalniki, bo ŭ ich jość artykuł — za chulihanstva, za kidańnie kamianioŭ, za źniavahu ŭładaŭ, nu i hetak dalej».
