Minabarony Ukrainy dazvoliła vajskoŭcam u Krymie vykarystoŭvać zbroju. Pra heta paviedamiła pres-słužba viedamstva.
«Zhodna z rašeńniem v.a. Viarchoŭnaha Hałoŭnakamandujučaha Uzbrojenych sił Ukrainy (Alaksandra Turčynava) i v.a. ministra abarony Ukrainy (Ihara Cieniucha), na padstavie zahadu načalnika Hienieralnaha štaba — Hałoŭnakamandujučaha Uzbrojenymi siłami (Michaiła Kucina), vajskovym častkam Ukrainy, dysłakavanym u Aŭtanomnaj Respublicy Krym, dazvolena prymianieńnie zbroi», — havorycca ŭ paviedamleńni.
Takoje rašeńnie było pryniata dla abarony vajskoŭcaŭ u suviazi z hibiellu praparščyka Uzbrojenych sił Ukrainy Kakuryna S.V. padčas šturmu 13-ha fotahramietryčnaha centra Hałoŭnaha ŭpraŭleńnia apieratyŭnaha zabieśpiačeńnia Uzbrojenych Sił Ukrainy ŭ Simfieropali.
Taksama byli apublikavanyja detali padziej u Simfieropali.
Kakuryn, jaki znachodziŭsia na nahladalnaj viežy aŭtaparka častki, byŭ zabity pramym papadańniem u vobłaść serca.
Akramia taho, byŭ paranienyja ŭ šyju i ruku kapitana Fiadun V.A. Jašče adzin ukrainski vajskoviec atrymaŭ ciažkija traŭmy noh i hałavy «ad udaraŭ dubinkami, armaturaj i inšymi pradmietami».
«Napadniki byli apranutyja ŭ vajennuju formu vajennasłužačych Uzbrojenych sił Rasijskaj Fiederacyi biez znakaŭ adroźnieńnia i ŭzbrojenyja aŭtamatyčnaj zbrojaj i snajpierskaj vintoŭkaj», — havorycca ŭ paviedamleńni.
Pavodle abaronnaha viedamstva, kamandzira častki pałkoŭnika Andreja Andrušyna zachapili padčas pieramovaŭ, utrymlivajuć u asobnym pamiaškańni i siłaj prymušajuć pierajści «na bok krymskaha naroda».
