U Homieli padčas pažaru ŭ 18-paviarchovym žyłym domie pa Rečyckim praśpiekcie zahinuli dva čałavieki, jašče dvoje atrymali surjoznyja apioki.
112.by
Pažar adbyŭsia viečaram 24 krasavika ŭ kvatery na 16-m paviersie, haspadynia jakoj adznačała 51-šy dzień naradžeńnia. Jak paviedamiła BiełaPAN aficyjny pradstaŭnik USK pa Homielskaj vobłaści Maryja Kryvanohava, pry pažary zahinuli vinoŭnica ŭračystaści i jaje muž 1965 hoda naradžeńnia. Dačka i jaje sužyciel atrymali množnyja apioki i znachodziacca ŭ reanimacyi ŭ ciažkim stanie.
«Kala 21.10 susiedka adčyniła dźviery na hrukat i ŭbačyła abharełuju dziaŭčynu, jakaja paviedamiła, što haryć ich kvatera.
Žančyna vyklikała ratavalnikaŭ. Na miesca prybyli supracoŭniki MNS, chutkaja dapamoha, apieratyŭnaja hrupa», — raskazała Kryvanohava.
Pryčyna pažaru ŭstanaŭlivajecca. Pavodle papiarednich źviestak, siamja na ŭliku ŭ milicyi nie stajała, susiedzi charaktaryzujuć jaje stanoŭča.
U kvatery žyła zahinułaja siamiejnaja para, ich dačka z sužycielem i ŭnučka 2010 hoda naradžeńnia. Adnak viečaram 24 krasavika dziaŭčynku zabrali pahaściavać baćki byłoha muža dački, tamu dziciaci nie było ŭ kvatery ŭ momant pažaru.
Pravierku pa hetym fakcie pravodzić Homielski haradski adździeł SK.