Na pres-kanfierencyi, pryśviečanaj procidziejańniu niezakonnamu abarotu narkotykaŭ, jakaja 6 maja prajšła ŭ novaj hramadskaj pryjomnaj ŁDP u Minsku, byli abnarodavanyja prapanovy pa vyrašeńni prablem u hetaj śfiery.
Jak nahadaŭ prysutnym pradstaŭnikam hramadskich arhanizacyj dyrektar infarmacyjna-aśvietnaj ustanovy «Aktualnaja kancepcyja», kaardynatar prajekta «Antymak» Alaksandr Špakoŭski, u Biełarusi adznačajecca biesprecedentny rost narkamanii. Naprykład, kali ŭ 1985 hodzie ŭ krainie było zarehistravana 75 narkazaležnych, to ciapier — kala 20 tysiač. A kali ŭličvać faktar łatentnaści, možna havaryć ab 150-200 tysiačach čałaviek.
«My stvarajem hramadski kaardynacyjny saviet pa procidziejańni narkatyzacyi, — raskazaŭ Špakoŭski. — Nieabchodnaść jaho stvareńnia zaklučajecca ŭ tym, što dziaržava marudna reahuje na vykliki i pahrozy, jakija ŭźnikajuć. Heta i zrazumieła, bo dziaržava — heta biurakratyčny aparat, a niepasredna vychavańniem hramadstva, padrychtoŭkaj alternatyŭnych zakanadaŭčych prapanoŭ, navatarstvam pavinny zajmacca hramadskija abjadnańni. Raniej jany pracavali kožnaje samo pa sabie, siońnia źjaviłasia mahčymaść stvaryć placoŭku dla kaardynacyi hetaj dziejnaści».
Špakoŭski paviedamiŭ ab ty, što na bazie hramadskich pryjomnych ŁDP buduć arhanizavany pastajannyja jurydyčnyja kansultacyi pa pytańniach, źviazanych z narkamanijaj. «Pa roznych pryčynach ludzi, asabliva ź nieabaronienych słajoŭ, časam apasajucca źviartacca ŭ milicyju, — patłumačyŭ jon, — tamu što abhruntavana apasajucca, što budzie pahroza biaśpiecy ich žyćcia, nie chočuć udzielničać u śledčych dziejańniach. My možam im prapanavać na ŭmovach ananimnaści źviartacca da nas, i voś funkcyju prystupki pamiž uładaj i hramadzianinam my prymiem na siabie. Atrymaŭšy infarmacyju, pravierym jaje, čałavieka prakansultujem, daviadziem da pravaachoŭnych orhanaŭ i budziem adsočvać dalejšyja dziejańni. Što ž da krynicy infarmacyi, my jaje nie raskryvajem, kali na toje niama dobraj voli čałavieka, ad jakoha pastupiŭ sihnał».
