Volha Kłaskoŭskaja, asudžanaja ŭ Šviecyi za zamach na zabojstva muža, źviarnułasia ŭ Ministerstva justycyi karaleŭstva z prośbaj ekstradavać jaje na radzimu, u Biełaruś. Ab hetym paviedamiła maci Volhi Ludmiła Kłaskoŭskaja.
Niekalki tydniaŭ tamu sama Ludmiła Kłaskoŭskaja źviartałasia ŭ Hienieralnuju prakuraturu Biełarusi z chadajnictvam ab pieravodzie ŭ krainu dački i ab pierahladzie jaje spravy. Pavodle słoŭ Kłaskoŭskaj, Hienprakuratura prainfarmavała jaje ab tym, što vyjšła praz MZS Biełarusi na kampietentnyja orhany Šviecyi z prośbaj «pradstavić nieabchodnyja dakumienty dla razhladu pytańnia ab pryjomie Volhi Kłaskoŭskaj u papraŭčuju ŭstanovu Biełarusi». Paśla pastupleńnia hetych dakumientaŭ pytańnie ab pryjomie budzie razhledžana pa sutnaści, zapeŭnili maci asudžanaj u Hienprakuratury.
Nahadajem, Volha Kłaskoŭskaja była zatrymana viasnoj minułaha hoda ŭ horadzie Chaninhu što na poŭdzień ad Stakholma. Dahetul jana niekalki hadoŭ žyła ŭ Šviecyi. U 2011 hodzie viarnułasia ŭ Biełaruś z-za siamiejnych prablem, ale chutka znoŭ pajechała ŭ Šviecyju, dzie ŭziała šlub ź miascovym žycharom, a ŭ lipieni 2012 hoda naradziła syna. Dakumienty na atrymańnie prava na žycharstva ŭ Šviecyi padavała dvojčy: paśla ŭziaćcia šlubu i paśla naradžeńnia dziciaci. U kancy studzienia 2013 hoda stała viadoma, što ŭłady Šviecyi admovili joj u atrymańni prava na žycharstva i pryniali rašeńnie ab jaje departacyi biez mahčymaści abskardžańnia.
6 lutaha pradstaŭniki sacyjalnych słužbaŭ Šviecyi zabrali ŭ Kłaskoŭskaj małaletniaje dzicia ŭ suviazi z tym, što ŭ jaje niama prava na žycharstva ŭ hetaj krainie i jana nie moža zabiaśpiečyć synu narmalnyja ŭmovy pražyvańnia. 8 lutaha Kłaskoŭskaja i jaje advakat sustrakalisia z pradstaŭnikom sacsłužbaŭ, jaki paviedamiŭ, što dzicia pieradadziena baćku.
Ludmiła Kłaskoŭskaja aburanaja pavodzinami šviedskich uładaŭ, jakija, jak zajaviła jana, «błakirujuć usiu infarmacyju pra dzicia». Tym nie mienš, pavodle słoŭ Kłaskoŭskaj, Volha vielmi spadziajecca na sustreču z synam i dla taho, kab parazmaŭlać ź im, skazać, što jana jaho maci, pajšła na kursy šviedskaj movy.
Dačka Kłaskoŭskaj Mirasłava, pavodle rašeńnia šviedskich uładaŭ, taksama padlahała departacyi. U Šviecyju pa dziaŭčynku jeździła jaje babula. Zaraz Mirasłava žyvie z baćkam.
23 žniŭnia Stakholmski sud pryznaŭ Volhu Kłaskoŭskuju vinavataj u zamachu na zabojstva byłoha muža Hiokaja Biezhina. Volha była pryhavorana da vaśmi hadoŭ turemnaha źniavoleńnia i pavinna vypłacić hrašovuju kampiensacyju Biezhinu ŭ 110 tysiač šviedskich kron. 5 listapada Apielacyjny sud Stakholma pakinuŭ pryhavor u sile, ale termin turemnaha źniavoleńnia skaraciŭ da siami hadoŭ. Viarchoŭny sud nie staŭ razhladać spravu Kłaskoŭskaj, i ŭ siaredzinie śniežnia jaje pieraviali ŭ turmu Chinsiebierh za 200 kiłamietraŭ ad Stakholma.
U kancy lutaha 2014 hoda Volhu pieraviali ŭ žanočuju turmu asabliva strohaha režymu Istad na poŭdni Šviecyi na miažy z Danijaj za 700 km ad stalicy. Tut utrymlivajucca ŭ asnoŭnym emihrantki, i ŭ bolšaści svajoj za vykradańnie ŭ šviedskich mužoŭ svaich dziaciej.
