Ukraina nie pryznaje doŭh za pryrodny haz pamieram 3,5 młrd dalaraŭ, jaki vystaŭlajecca rasijskim hazavym manapalistam, kampanijaj «Hazprom», «Naftahazu Ukrainy».
«My nie prymajem hety doŭh», — skazaŭ žurnalistam ministr enierhietyki i vuhalnaj pramysłovaści Juryj Prodan na pres-kanfierencyi ŭ Kijevie.
U toj ža čas ministr admoviŭsia nazyvać sumu doŭhu, jakuju ŭkrainski bok ličyć prymalnaj.
«Da suda, abo da ŭrehulavańnia situacyi, ja nie budu nazyvać sumu», — skazaŭ jon.
Taksama Prodan adznačyŭ, što na nastupnym tydni, u paniadziełak, u Bruseli źbiarecca trochbakovaja rabočaja hrupa pa vypracoŭcy prapanoŭ dla vyrašeńnia hazavych pytańniaŭ ES, Ukrainy i Rasii.
Kamientujučy zajavu rasijskaha boku ab mahčymym pieravodzie NAK «Naftahaz Ukrainy» na avansavyja płaciažy za červieńskija pastaŭki hazu, ministr skazaŭ: «My nie možam zrabić pieradapłatu pa 485 dalaraŭ za tysiaču kubamietraŭ».
Pavodle «Hazproma», zapazyčanaść Ukrainy za rasijski haz na 30 krasavika składaje 3,492 młrd dalaraŭ.
«Hazprom» z krasavika vyrašyŭ admianić usie lhoty na pastaŭku hazu Ukrainie, patłumačyŭšy heta tym, što ŭkrainski partnior nie vykonvaje dasiahnutyja damoŭlenaści adnosna pahašeńnia zapazyčanaści za pastaŭki hazu. U vyniku hetaha cana na rasijski haz z krasavika 2014 h. pavialičyłasia da 480 dalaraŭ za tysiaču kubamietraŭ z $268,5 u pieršym kvartale hetaha hoda.
Ukraina pryznaje najaŭnaść doŭhu ŭ 2,2 młrd dalaraŭ za pastaŭki hazu da 1 krasavika 2014 hoda, ale hatovaja apłacić jaho ŭ 10-dzionny termin tolki paśla źnižeńnia «Hazpromam» cany na haz da 268,5 dalara za tys. kubamietraŭ.
«Naftahaz» užo pačaŭ pieradarbitražnuju praceduru padačy pazovu da «Hazproma» ab pierahladzie cany na haz. U bakoŭ da 28 maja 2014 hoda jość čas dasiahnuć miravoha pahadnieńnia.
