Abviaščeńnie vynikaŭ refierendumu ŭ Łuhansku. Fota Rojterz.
Danieckaja narodnaja respublika (DNR) abviaściła siabie suvierennaj dziaržavaj pa vynikach refierendumu ab statusie rehijona, zajaviŭ u paniadziełak sustaršynia časovaha ŭrada DNR Dzianis Pušylin.
«My, narod Danieckaj narodnaj respubliki, pa vynikach refierendumu, praviedzienaha 11 maja 2014 hoda, i hruntujučysia na dekłaracyi ab suvierenitecie DNR, abjaŭlajem, što z hetaha času DNR źjaŭlajecca suvierennaj dziaržavaj. <…> Zychodziačy z volevyjaŭleńnia naroda Danieckaj narodnaj respubliki i dla adnaŭleńnia histaryčnaj spraviadlivaści prosim Rasijskuju Fiederacyju razhledzieć pytańnie ab uvachodžańni Danieckaj narodnaj respubliki ŭ skład Rasijskaj Fiederacyi», — začytaŭ Pušylin «zaklik DNR».
U paniadziełak, kamientujučy vyniki refierendumaŭ u Łuhanskaj i Danieckaj abłaściach, pres-słužba Kramla paviedamiła, što « ŭ Maskvie z pavahaj staviacca da volevyjaŭleńnia nasielnictva Danieckaj i Łuhanskaj abłaściej i zychodziać z taho, što praktyčnaja realizacyja vynikaŭ refierendumaŭ projdzie cyvilizavanym šlacham, bieź jakich-niebudź recydyvaŭ hvałtu, praz dyjałoh pamiž pradstaŭnikami Kijeva, Daniecka i Łuhanska».
U zakliku taksama idzie havorka pra toje, što vyšejšym orhanam dziaržaŭnaj ułady ŭ Danieckaj narodnaj respublicy z hetaha času źjaŭlajecca Viarchoŭny saviet, jaki farmuje ŭrad DNR i Saviet biaśpieki DNR. Pušylin dadaŭ, što novaje dziaržaŭnaje ŭtvareńnie abaviazvajecca vykonvać svabodu sumleńnia i vieravyznańnia ŭsich tradycyjnych relihijnych kanfiesij i pavažać tradycyjnyja punktu hledžańnia ŭ śfiery relihii.
Refierendum, praviedzieny ŭ Danbasie, pad rulami rasijskich aŭtamataŭ, nie pryznała nivodnaja dziaržava śvietu.
