Biełaruskaja delehacyja admoviłasia ad sustrečy z rabočaj hrupaj Parłamienckaj asamblei ABSIE pa Biełarusi, pakolki paličyła takuju sustreču «pustoj trataj času».
Pra heta zajaviŭ namieśnik staršyni pałaty pradstaŭnikoŭ nacyjanalnaha schodu Biełarusi Viktar Huminski.
Jak raniej paviedamlałasia, sustreča płanavałasia ŭ miežach štohadovaj siesii PA ABSIE, jakaja prachodziła ŭ Baku z 28 červienia pa 2 lipienia. Huminski ŭznačalvaŭ u Baku biełaruskuju delehacyju.
Pavodle słoŭ vice-śpikiera nižniaj pałaty, prapanova ab sustrečy pastupiła ad kiraŭnika rabočaj hrupy pa Biełarusi Kryścijana Cholma.
«Biełaruskaja delehacyja ŭ majoj asobie admoviłasia ad hetaj sustrečy tolki z-za adnaho: na siońnia nie bačym, kab u Cholma, jaki źmianiŭ na hetaj pasadzie Utu Capf, źjavilisia niejkija novyja padychody suprać tych, što byli ŭ Capf, ź jakoj vieści praduktyŭny dyjałoh na niejkija temy było niemahčyma, — zajaviŭ Huminski. — Na hety čas niejkaha kanstruktyvizmu asabista ŭ dziejańniach Cholma ja nie ŭbačyŭ, jak i ŭsia naša delehacyja. Ja jamu skazaŭ, što hublać čas na pustyja razmovy — niedaravalnaja raskoša».
Na dumku parłamientaryja, dziejańni Cholma padčas siesii «zusim nie źmianilisia ŭ płanie niejkich padychodaŭ u suviazi sa źmienlivym stanoviščam i ŭ cełym situacyi ŭ śviecie». «U jaho tolki adny źbityja frazy, jakija kožny raz jon nam naviazvaje.
Aprača demakratyčnych instytutaŭ i palityčnych viaźniaŭ jon bolš ni pra što nie havoryć. Ale zadavaŭ ja jamu pytańnie pra tych ža viaźniaŭ, jon mnie ničoha nie zmoh skazać. Navošta mnie takija abmierkavańni i razmovy?»
«Jaho ž pierakanańni ab tym, što my mahli b razhledzieć pytańni, źviazanyja z Ukrainaj, naohuł absurdnyja, tamu što praktyčna ŭsia siesija była pryśviečana mienavita hetym pytańniam, — zajaviŭ Huminski. — I nijakaja rabočaja hrupa nie moža vypracavać jakija-niebudź padychody, kali hetym zajmałasia praktyčna ŭsia asambleja. I hetyja kanstruktyŭnyja padychody byli vypracavany padčas abmierkavańnia hetaha pytańnia, jakomu nadavałasia asablivaja ŭvaha i byŭ adviedzieny śpiecyjalny čas dla dyskusij. I ŭ hetych dyskusijach uziała ŭdzieł i naša delehacyja. Tamu abmiarkoŭvać pytańnie na pasiadžeńni rabočaj hrupy — taksama pustaja trata času. Pa hetych pryčynach Cholmu było admoŭlena».
Pry hetym Huminski nie vyklučyŭ, što ŭ nastupnym sustreča biełaruskich parłamientaryjaŭ z rabočaj hrupaj PA ABSIE pa Biełarusi moža adbycca. «Tam pahladzim. Kali ŭ jaho ź`iaviacca niejkija kanstruktyŭnyja prapanovy, nad jakimi možna budzie pracavać i jakija možna budzie sumiesna abmiarkoŭvać, ja nie vyklučaju, što vierniemsia da razmovy», — skazaŭ vice-śpikier.
Kamientujučy pryniaćcie palityčnym kamitetam, a taksama kamitetam pa demakratyi, pravach čałavieka i humanitarnych pytańniach PA ABSIE rezalucyj, što ŭtrymlivajuć punkty ab situacyi ŭ Biełarusi, Huminski zaznačyŭ: «Heta asabista Cholm unios dźvie papraŭki. Na žal, niahledziačy na toje, što ja vystupaŭ pa ich z abviaržeńniem, bolšaść, jak zaŭsiody, moŭčki prahałasavała pa ich». «Ale vielmi mnohija byli i suprać. Pakul my nie bačym niejkaj kanstruktyŭnaści ŭ dziejańniach Cholma», — dadaŭ Viktar Huminski.
***
Kamitet pa demakratyi i pravach čałavieka zaklikaŭ Biełaruś nieadkładna vyzvalić i reabilitavać usich palityčnych viaźniaŭ. «Ja miarkuju, hety punkt pavinien uklučacca ŭ hetu rezalucyju zaŭsiody, kali jana prymajecca. Ni ŭ adnoj narmalnaj krainie, ni ŭ adnaho narmalnaha lidara nie pavinna być palityčnych viaźniaŭ», — zajaviŭ u kamientaryi Kryścijan Cholm.
Jon vykazaŭ škadavańnie nakont taho, što sustreča ź biełaruskaj delehacyjaj nie adbyłasia. «Ja spadziajusia, što my zmožam pravieści kanstruktyŭnyja sustrečy padčas nastupnych siesij PA ABSIE», — skazaŭ kiraŭnik rabočaj hrupy pa Biełarusi ŭ kamientaryi BiełaPAN.
