Biełaruś płanuje ŭrehulavać roznahałośsi, źviazanyja z uviadzieńniem Ukrainaj śpiecpošlin na šerah biełaruskich tavaraŭ. Pra heta havorycca ŭ kamientaryi načalnika ŭpraŭleńnia infarmacyi — pres-sakratara MZS Dźmitryja Mirončyka nakont rašeńnia mižviedamasnaj kamisii pa mižnarodnym handli Ukrainy.
«Raźličvajem, što čas, jaki majuć baki da ŭvachodžańnia ŭ siłu rašeńnia Mižviedamasnaj kamisii pa mižnarodnym handli Ukrainy, budzie vykarystany dla ŭrehulavańnia roznahałośsiaŭ, što majucca ŭ bakoŭ, u režymie niepasrednaha dyjałohu. U chutkim časie ŭ Minsku čakajucca adpaviednyja kansultacyi z ukrainskimi ekśpiertami», — zaznačyŭ Mirončyk.
Ukraina ŭviała zaharadžalnyja pošliny na małočnuju pradukcyju, kandytarskija vyraby, piva, elektralampy napalvańnia, uhnajeńni, šyny, chaładzilniki. Zhodna z rašeńniem mižviedamasnaj kamisii pa mižnarodnym handli Ukrainy, pošliny ŭvodziacca praz 10 dzion paśla siońniašniaha apublikavańnia. Tak, na elektryčnyja lampy napalvańnia, minieralnyja ci chimičnyja ŭhnajeńni z utrymańniem azotu, fosfaru i kaliju, što impartujucca ź Biełarusi, uvodzicca pošlina ŭ 55,29% ad mytnaha koštu hetaj pradukcyi. Dla biełaruskich aŭtamabilnych, aŭtobusnych pakryšak, a taksama šyn dla vykarystańnia na sielskahaspadarčych abo lesahaspadarčych transpartnych srodkach Ukraina ŭvodzić pošliny ŭ 60,05% ad mytnaha koštu. Aprača taho, na pieralik chaładzilnikaŭ i chaładzilnaha abstalavańnia biełaruskaj vytvorčaści ŭvodziacca śpiecpošliny ad 55,29% da 60,05% u zaležnaści ad abjomu chaładzilnych kamier.
Na małako, viarški, johurty, kiefiry, masła, a taksama na kandytarskija vyraby z cukru, šakaład i mučnyja prysmaki, što impartujucca ź Biełarusi, uvodzicca pošlina ŭ 55,29% ad mytnaha koštu hetaj pradukcyi. Dla biełaruskaha soładavaha piva Ukraina ŭvodzić pošliny ŭ 60,05% ad mytnaha koštu. Śpiecyjalnyja pošliny buduć prymianiacca da zhadanych tavaraŭ da 31 śniežnia 2016 hoda. Rašeńnie kamisii nabyvaje moc praz 10 dzion z momantu jaho apublikavańnia.
1 červienia pastanovaj Savieta ministraŭ Biełarusi № 469 «Ab licenzavańni impartu asobnych vidaŭ makaronnych vyrabaŭ, a taksama kandytarskich vyrabaŭ i syraviny dla ich vytvorčaści z-za miežaŭ adzinaj mytnaj terytoryi Mytnaha sajuza» ŭviedziena abaviazkovaje licenzavańnie hetaj pradukcyi Ministerstvam handlu paśla padpisańnia pahadnieńniaŭ ab minimalnych cenach z kancernam «Biełdziaržcharčpram».
Aprača taho, 1 maja Biełaruś uviała licenzavańnie impartu piva z-za miežaŭ Mytnaha sajuza. Impart piva ažyćciaŭlacca zaraz pa razavych licenzijach, vydavać jakija ŭpaŭnavažana Ministerstva handlu pa ŭzhadnieńni z kancernam «Biełdziaržcharčpram». Padstavaj dla vydačy licenzii źjaŭlajecca padpisańnie imparcioram dakumienta ź biełaruskim bokam ab minimalnych cenach na piva, pa jakich jačmienny napoj budzie pradavacca ŭ krainie.
«My pryniali da viedama hetaje rašeńnie našych ukrainskich partnioraŭ. Nie možam pahadzicca ź jaho matyvacyjaj, tamu što Biełaruś nie rabiła jakich-niebudź krokaŭ u dačynieńni mienavita da Ukrainy. Tym bolš niazhodnyja z tym, što našy kroki traktujucca jak «niedružalubnyja», — zaznačyli ŭ MZS.
Na dumku źniešniepalityčnaha viedamstva, licenzavańnie impartu asobnych tavaraŭ u Biełarusi, «jakoje vyklikała niehatyŭnuju reakcyju ŭkrainskaha boku, raspaŭsiudžana na niavyznačanaje koła krain, a nie vyklučna suprać Ukrainy, jak heta kamuści chočacca padać. Bolš za toje, heta taksama ŭ poŭnaj miery ŭpisvajecca ŭ farmat mižnarodnaha handlu: miechanizm licenzavańnia ŭstanoŭleny tolki na šaścimiesiačny termin. Licenzavańnie nijakim čynam nie aznačaje zabaronu abo kvatavańnie, a tolki niekatoraje ŭparadkavańnie rynku. Ukrainskija ž partniory majuć namier abkładvać pošlinami ŭ pamiery 55-60% vyklučna biełaruskija tavary i na pieryjad da 31 śniežnia 2016 hoda».
