Siońnia Alaksandr Łukašenka pryznačyŭ novaha kiraŭnika dziaržaŭnaha Mytnaha kamiteta. Im staŭ 47-hadovy Juryj Siańko.
Aficyjnaja bijahrafija hetaha čałavieka nie strakacić faktami. Navat nie paznačajecca miesca jahonaha naradžeńnia. Pavodle infarmacyi «Našaj Nivy»,
Juryj Siańko pachodzić ź vioski Varonča Karelickaha rajona. Pra hetuju viosku ŭ «Ziamli pad biełymi kryłami» zhadvaŭ Uładzimir Karatkievič, nazyvajučy muziejem pad adkrytym niebam.
Kali cikava bolej daviedacca pra radzimu novaha staršyni Mytnaha kamiteta, to možacie pahladzieć admysłovy vypusk pieradačy «Padarožžy dyletanta» ź Juryjem Žyhamontam.
Viadoma, što Juryj Siańko skončyŭ Hrodienski dziaržaŭny ŭniviersitet imia Janki Kupały, fakultet pravaznaŭstva. Paśla čaho i zastaŭsia na pracy ŭ Hrodnie.
Zajmaŭ roznyja pasady ŭ Hrodienskaj rehijanalnaj mytni. U 35 hadoŭ uznačaliŭ Hrodzienskuju rehijonalnuju mytniu. U 2011 Siańko pieraviali kiraŭnikom Minskaj rehijanalnaj mytni. Praca ŭ Minsku bolš adkaznaja, istotna bolš abjom pracy.
«Chutka, jakasna, z uśmieškaj na tvary», - takija rekamiendacyi svaim kaleham davaŭ Juryj Siańko.
Hrodzienski žurnalist Andrej Pačobut niekalki razoŭ sutykaŭsia ź Juryjem Siańko, kali apošni jašče pracavaŭ u Hrodnie. «Heta byŭ trochu valniejšy čas, tamu jon moh razmaŭlać ź niezaležnymi žurnalistami, tady mnohija mahli sabie heta dazvalać. Za čas jahonaj pracy mnohija supracoŭniki Hrodzienskaj mytni apynulisia ŭ turmie.
Ale Mytny kamitet – heta takaja dziŭnaja struktura, dzie praviny padnačalenych nijak nie adbivajucca na načalstvie. Kali ŭ milicyi, skažam, sadžajuć supracoŭnikaŭ, to heta vyłazić bokam i kiraŭnictvu MUS, a voś u Mytnym kamitecie nie tak».
Pačobut adznačaje, što Mytny kamitet – heta ŭsio ž nie represiŭny orhan, a struktura, jakaja robić usio, kab zarabić bolš hrošaj dziaržavie. Tym nie mienš, ź imiem Siańko źviazanaja adna nie samaja pryhožaja historyja, kali ŭ 2006 hodzie hrodzienskija mytniki, nibyta znajšli narkotyki ŭ aŭtamabili tahačasnaj kiraŭnički Sajuza palakaŭ Anžaliki Borys.
«Ja nie dumaju, što heta rabiłasia pa zahadzie Siańko, - praciahvaje Pačobut. – Adzinaje, što ŭzhadvaju, dyk heta błytanina ŭ jahonych słovach, jakija narkotyki byli znojdzienyja, i aficyjnym paviedamleńniem na hety kont». Darečy, taja sprava nijakaja praciahu nie mieła. I prosta była zakrytaja.
Što tyčycca byłoha kiraŭnika, 61-hadovaha Alaksandra Špileŭskaha, to hety doŭhažychar ŭładnaha alimpa 13 hadoŭ jon uznačalvaŭ Mytny kamitet. Špileŭski vychadziec z KDB.
