Siońnia stała viadoma, što na 68-ym hodzie žyćcia pamior Valeryj Frałoŭ. «Naša Niva» sabrała cikavyja fakty pra hetaha čałavieka.
Nie zaplamiŭ siabie ŭ Vilni 1991 hoda
U 1991 hodzie Valeryj Frałoŭ byŭ pryznačany kamandziram dyvizii ŭ Prybałtyjskaj vajskovaj akruzie. Mieściłasia dyvizija ŭ Vilni. Adbyvałasia heta jakraz u toj čas, kali Litva imknułasia da niezaležnaści. Najbolš kryvavymi padziejami taho času staŭ šturm Vilenskaj televiežy ŭnoč na 13 studzienia. Tady zahinuła 13 čałaviek, a bolš za sotniu byli paranienymi. U vyniku ŭ Litvie byli zaviedzienyja kryminalnyja spravy suprać ministra abarony SSSR Dźmitryja Jazava, staršyni KDB Uładzimira Kručkova, kamandzira vilenskaha harnizona Uładzimira Uschopčyka (ciapier žyvie ŭ Biełarusi, aficyjny Minsk admaŭlajecca vydać jaho Litvie), kiraŭnika vilenskaha AMAP Balasłava Makutynoviča.
Frałova pierakinuli ŭ Vilniu ŭ červieni 1991 hoda, jakraz na miesca Uschopčyka. Potym jašče abaraniali z BTRami budynak Uschopčyka ŭ Vilni.
Dyvizija Frałova abaraniała budynak litoŭskaha CK padčas padziej putču HKČP, vyvoziła adtul dakumienty. «Ja ŭsio čakaŭ, što stralba pačniecca. Razumieŭ, jakaja situacyja. A kali litoŭcy pačnuć stralbu, to kirdyk. Maje ž taksama sopli žavać nie buduć. Tady voli nie było ŭ Michaiła Siarhiejeviča Harbačova. Usio ž taki šeść dyvizij, dźvie desantnyja — tam by imhnieńniem heta patušyli. Kali b bolš žorstkija. Ale ja bačyŭ, što narod užo nie choča. Ci to ja sam stychijny demakrat, ci to chren viedaje. Ale kryvi nie chaciełasia», — pryznavaŭsia Valeryj Frałoŭ u intervju kyky.org. Vitaŭtas Łandśbierhis pahražaŭ Frałovu sudom za toj incydent kala CK, adnak kryvi pralita nie było.
U Litvie Frałoŭ słužyŭ z byłym prezidentam Čačni Asłanam Maschadavym, apošni byŭ u padparadkavańni Frałova.
U parłamiencie pierajšoŭ u apazicyju
U pałatu pradstaŭnikoŭ hienierał Valeryj Frałoŭ vyłučaŭsia jak kandydat ad ułady. Ale ŭžo ŭ parłamiencie jon razam z pradprymalnikam Siarhiejem Skrabcom i spartoŭcam Uładzimiram Parfianovičam stvaryŭ apazicyjnuju hrupu deputataŭ «Respublika». Mienavita imi była praviadzienaja pamiatnaja haładoŭka za źmieny ŭ vybarčaje zakanadaŭstva ŭ 2004 hodzie.
Da parłamienta Valeryj Dźmitryjevič kiravaŭ 28-ym armiejskim korpusam, štab jakoha mieściŭsia ŭ Hrodnie, a vajskovyja častki ŭ Hrodzienskaj i Bresckaj abłaściach. Cikava, što ŭ hetym čas pad kiraŭnictvam Valeryja Frałova słužyŭ siońniašni dziaržsakratar Rady biaśpieki Alaksandr Miažujeŭ.
Mitynh prychilnikaŭ abjadnańnia z Rasijaj
U palitycy jon zapomniŭsia mnohimi niepradumanymi i supiarečlivymi krokami. Naprykład, u 2007 i 2008 hadach hienierał Valeryj Frałoŭ razam ź Siarhiejem Skrabcom pravodzili akcyi ŭ padtrymku jadnańnia Biełarusi i Rasii. Na pieršaje mierapryjemstva pryjšło kala 10 čałaviek, a na druhoje — kala 40. Papularnaściu ŭ ludziej takija mierapryjemstvy nie karystalisia.
Hienierał Valer Frałoŭ tady trymaŭ sšyty ŭ adno rasijski ściah ź dziaržaŭnym biełaruskim. A ŭ svaim vystupie zhadaŭ, jak dobra žyłosia biełarusam pry SSSR, što BSSR była tady ŭ pryvilejavanym stanoviščy. A niezaležnaść zvaliłasia ŭ 1991 niečakana i dziakujučy Rasiei, — skazaŭ hienierał.
Jon doŭhi čas šukaŭ padtrymki ŭ Maskvie, ale tak i nie znajšoŭ. U apošnija hady žyćcia jon uvajšoŭ u kiraŭnictva sacyjał-demakratyčnaj partyi, byŭ namieśnikam staršyni.
Hienierał Frałoŭ i kosmas
U 2009 hodzie Valeryja Frałova absalutna niečakana pryznačyli daradcam hienieralnaha kanstruktara šmatfunkcyjanalnaj kaśmičnaj sistemy sajuznaj dziaržavy. Zdavałasia b, dzie hienierał, a dzie kosamas. Praŭda, zatrymaŭsia na hetaj pasadzie jon zusim niadoŭha.
Frałoŭ zapomniŭsia frazaj, što z kosmasu navat za žonkaj sačyć možna.
U Valeryja Frałova było dźvie žonki. Pieršaja pamierła jašče ŭ 2003 hodzie. Potym była druhaja žonka Natalla Šynkievič, ale raźvialisia. «Stamiŭsia ja ad vychavaŭčaha pracesu, jaki jana pravodziła», — kazaŭ hienierał. Apošnija hady jon žyŭ razam z synam. «Žyviom ja, syn i sabaka — try mužyki». Byŭ vialikim amataram łaźni, u jaho było šmat siabroŭ.
Vyłučaŭsia ŭ prezidenty
Vielmi doŭhi čas hienierała Frałova razhladali jak mahčymaha lidara apazicyi. Praŭda, potym mnohija rasčaravalisia ŭ takoj idei. U 2006 hodzie sp.Frałoŭ taki vyrašyŭ samastojna bałatavacca ŭ prezidenty, ale nie sabraŭ patrebnych 100 tysiač podpisaŭ. Sioleta jahonuju kandydatury znoŭ prapanoŭvali na rehijanalnych schodach aktyvistaŭ. Jon sam nie admaŭlaŭ mahčymaść bałatavacca. Ciapier užo nie los.
