Ź siońniašniaha dnia ŭ Biełarusi ŭstupajuć siłu papraŭki da Zakona «Ab vajennym stanoviščy». Nasupierak mierkavańniu niekatorych, punkt pra ŭzbrojenych asob biez apaznavalnych znakaŭ u formie prysutničaŭ i ŭ raniejšaj viersii zakona. Novyja punkty datyčać ADKB i ŭžyćcia zbroi suprać mirnych hramadzian.
ukrainianwall.com
U zakonie prapisanaja farmuloŭka «zasyłka inšaj dziaržavaj uzbrojenych bandaŭ (hrup), irehularnych sił ci padraździaleńniaŭ rehularnych vojskaŭ.
Prysutnaść na terytoryi Biełarusi tak zvanych «zialonych čałaviečkaŭ» (uzbrojenych asob biez apaznavalnych znakaŭ u formie) aficyjna ličycca adnym ź vidaŭ napadu, jaki pahražaje terytaryjalnaj cełasnaści i suvierenitetu dziaržavy.
Akramia taho, pahrozaj nacyjanalnaj biaśpiecy dziaržavy Biełaruś, dastatkovaj dla ŭviadzieńnia vajennaha stanovišča, źjaŭlajecca kancentracyja ŭzbrojenych sił inšaj dziaržavy la biełaruskich miežaŭ.
Jak piša analityk Dzianis Mieljancoŭ na sajcie naviny.by, u cełym novaja viersija zakona strukturavanaja lepš papiaredniaj, źmiaščaje bolš vyraznyja farmuloŭki i bolš detalova rehłamientuje dziejnaść dziaržaŭnych orhanaŭ i apisvaje pravavoje stanovišča hramadzian i arhanizacyj.
Nielha skazać, što novy zakon papiaredžvaje kanflikt z Rasijaj, jon u bolšaj stupieni adaptavany da sajuźnickich abaviazalnictvaŭ Biełarusi ŭ ramkach ADKB.
Pa-pieršaje, napadam na Biełaruś ciapier ličycca akt ahresii suprać luboj dziaržavy-ŭdzielnika ADKB, čaho raniej u zakonie nie było. Heta značyć, kali taliby napaduć na Tadžykistan, to heta aŭtamatyčna ličycca napadam na Biełaruś i moža stać padstavaj dla ŭviadzieńnia vajennaha stanovišča. Toje samaje spraviadliva, kali Ukraina abvieścić vajennaje stanovišča i budzie vieści bajavyja dziejańni suprać Rasijskaj Fiederacyi.
Pa-druhoje, ŭdakładnieny pieralik abjektaŭ dla vajennaj pahrozy: ciapier heta nie tolki Respublika Biełaruś u cełym, jaje suvierenitet i terytaryjalnaja cełasnaść, ale i kanstytucyjny ład.
Pa-treciaje, u abnoŭlenym zakonie bolš žorstki režym vajennaha stanovišča. Da prykładu, kali raniej masavyja mierapryjemstvy zabaranialisia abo abmiažoŭvalisia, to zaraz jany zabaraniajucca biez usialakich umovaŭ. Raniej zbroju ŭ hramadzian mahli časova adbirać tolki ŭ vyklučnych vypadkach «z ulikam situacyi», ciapier ža jana prosta «časova adbirajecca». Ale pry hetym prypynieńnie dziejnaści palityčnych partyj ciapier nie abaviazkovaja miera vajennaha stanovišča, a ažyćciaŭlajecca «ŭ vypadku parušeńnia imi zakanadaŭstva ab vajennym stanoviščy pa rašeńni rehistrujučaha orhana».
Pa-čaćviortaje, ŭviedzieny niekalki novych artykułaŭ, jakija rehłamientujuć užyvańnie fizičnaj siły, zbroi, śpiecsrodkaŭ i techniki vajskoŭcami, jakija zabiaśpiečvajuć režym vajennaha stanovišča. Analiz hetych artykułaŭ dazvalaje zrabić zaklučeńnie, što vajskoŭcy i inšyja asoby, jakija pryciahvajucca da zabieśpiačeńnia vajennaha stanovišča, majuć prava ŭžyvać siłu i zbroju praktyčna ŭ lubych situacyjach, u tym liku suprać biazzbrojnych hramadzianskich asob. Prapisana taksama prava na abhruntavanuju prafiesijnuju ryzyku. Pryčynieńnie škody pry abhruntavanym prafiesijnym ryzycy nie źjaŭlajecca pravaparušeńniem.
Jakraz hetyja artykuły navodziać na dumku pra ŭpłyŭ urokaŭ kanfliktu ŭ Ukrainie na aŭtaraŭ zakona, pakolki takaja detalovaja rehłamientacyja, pa ŭsioj bačnaści, zaklikanaja ŭličvać mahčymaść hibrydnaha kanfliktu, u tym liku z udziełam hramadzianskich asob, i pazbavić vajskoŭcaŭ ad mahčymych vahańniaŭ adnosna pravamiernaści prymianieńnia zbroi u nieadnaznačnych situacyjach.
Inšymi słovami, biełaruskija zakanadaŭcy imknulisia zahadzia vyklučyć situacyi nakštałt toj, kali nibyta «biazzbrojnyja hramadzianie» vymusili ŭkrainskich vajskoŭcaŭ pieradać braniatechniku ŭ ruki prarasiejskich «apałčencaŭ» u Kramatorsku ŭ krasaviku 2014, — piša Dzianis Mieljancoŭ.
