U Kličavie aktyvisty Biełaruskaj chryścijanskaj demakratyi i vierniki roznych chryścijanskich kanfiesij sabrali rečy dla palitviaźnia, siabra Biełaruskaj chryścijanskaj demakratyi Jaŭhiena Vaśkoviča. Sabranyja rečy jany pieradali maci palitviaźnia, jakaja bližejšym časam źbirajecca da jaho.
Aproč taho, aktyvisty BCHD abmierkavali płany dziejnaści i padviali vyniki 2014 hoda, paviedamiła mahiloŭskaja abłasnaja kaardynatarka chryścijanskich demakrataŭ Taisija Kabančuk.
Pierad hetym srodki dla Jaŭhiena Vaśkoviča źbirali ŭ Viciebsku padčas sustreč pradstaŭnikoŭ viciebskich demakratyčnych sił. «Padtrymać palitviaźnia — heta naš abaviazak», — kaža incyjatarka zboru srodkaŭ, viciebskaja kaardynatarka arhkamiteta pa stvareńni partyi BCHD Taćciana Sieviaryniec.
«My razumiejem, što jahonym svajakam ciažkavata ŭ materyjalnym płanie — usio, što źbirajuć u pasyłki i pieradačy, kaštuje niamała hrošaj. Tamu ŭsie sabranyja achviaravańni my pieradamo svajakam», — skazała jana.
