Krym i ŭschodnija rehijony Ukrainy žyvuć u «carstvie teroru», zajaviła namieśnica dziaržsakratara ZŠA Viktoryja Nułand, vystupajučy ŭ kamitecie sienata ZŠA pa mižnarodnych adnosinach.
«Choć Ukraina buduje mirnuju, demakratyčnuju i niezaležnuju dziaržavu na 93% svajoj terytoryi, Krym i častki ŭschodniaj Ukrainy pakutujuć u carstvie teroru», — skazała jana.
«Siońnia Krym zastajecca niezakonna akupavanaj terytoryjaj, nievykanańnie pravoŭ čałavieka źjaŭlajecca tut normaj, a nie vyklučeńniem, i mnohija žychary Kryma znachodziacca ŭ vielmi niebiaśpiečnym stanoviščy».
Pa słovach Viktoryi Nułand, krymskija tatary i ŭkraincy, jakija admovilisia zdavać svaje pašparty, seksualnyja mienšaści, žurnalisty i mnohija inšyja katehoryi nasielnictva žyvuć u pastajannym strachu pakarańnia.
«Va ŭschodniaj Ukrainie Rasija i jaje maryjanietki raźviazali ruki nieprymalnamu hvałtu i maradziorstvu», — skazała Viktoryja Nułand.
«Raźviazać kanflikt, kantralavany Kramlom, siłkavany rasiejskim uzbrajeńniem i finanavany hrašyma rasijskich padatkapłacielščykaŭ, kaštavaŭ žyćcia 6 tysiačam ukraincaŭ i sotniam maładych rasiejcaŭ, adpraŭlenych tudy Kramlom, — na vajnu, jakuju ich urad admaŭlaje», — zajaviła namieśnica dziaržsakratara ZŠA.
«Voś što my chočam ubačyć: poŭnaje spynieńnie ahniu na terytoryi ŭschodniaj Ukrainy, svabodny dostup va ŭsie zony kanfliktu, advod ciažkaha ŭzbrajeńnia i, narešcie, niedahladany propusk hruzaŭ praz ukrainskuju miažu. Kali ŭsie hetyja ŭmovy buduć całkam vykananyja, heta pryniasie mir va ŭschodniuju Ukrainu, u pieršy raz amal za hod. My budziem sudzić ab Rasii nie pa jaje słovach, a pa jaje dziejańniach. I tady ZŠA i našy mižnarodnyja partniory admieniać sankcyi ŭ adnosinach da Rasii. Heta adbudziecca tolki tady, kali minskija damoŭlenaści buduć vykananyja całkam. Advarotnaje taksama mahčyma: kali damoŭlenaści nie buduć vykonvacca, sankcyi buduć pašyranyja. Ciapier my pačali kansultacyi z našymi jeŭrapiejskimi partniorami pa pytańni ŭzmacnieńnia sankcyj u dačynieńni da Rasii ŭ vypadku, kali Maskva praciahnie raspalvać kanflikt na ŭschodzie i inšych častkach Ukrainy».
Na minułym tydni na papiarednich słuchańniach Nułand zajaviła, što z momantu pačatku kanfliktu ZŠA adpravili va Ukrainu 335 młn dalaraŭ finansavaj padtrymki ŭ dadatak da harantyj pazyki ŭ miljard dalaraŭ. Na miedycynskuju dapamohu, radary, prybory, jakija uskładniajuć pieradaču radyjosihnałaŭ, a taksama padrychtoŭku kadraŭ ZŠA patracili 118 młn dalaraŭ.
