Kitaj vyjšaŭ na treciaje miesca ŭ śviecie paśla ZŠA i Rasii pa abjomie ekspartu ŭzbrajeńniaŭ. Jak paviedamlaje Stakholmski mižnarodny instytut daśledavańniaŭ prablem śvietu (SIPRI), za apošnija piać hadoŭ Kitaj abyšoŭ pa hetym pakazčyku Hiermaniju, Francyju i Vialikabrytaniju.
Daśledavańnie SIRPI adlustroŭvaje tolki ahulnyja abjomy pastavak uzbrajeńniaŭ, nie kranajučysia finansavaha boku ździełak.
Na KNR ciapier prypadaje prykładna 5% suśvietnaha ekspartu ŭzbrajeńniaŭ. Dźvie traciny ekspartavanaj Kitajem zbroi kuplajuć try azijackija krainy — Pakistan, Banhładeš i Mjanma. Akramia taho, u apošnija piać hadoŭ Kitaj pastaŭlaŭ uzbrajeńni ŭ 18 afrykanskich krain.
Za piać hadoŭ da 2014 hoda abjomy kitajskaha ekspartu zbroi ŭzraśli na 143%. Za hety ž čas ekspart uzbrajeńniaŭ z Hiermanii skaraciŭsia na 43%, a z Francyi — na 27%. Pry hetym ahulnyja abjomy handlu zbrojaj u śviecie za hety ž pieryjad uzraśli na 16%.
Niahledziačy na imklivy rost abjomaŭ ekspartu kitajskaha zbroi, KNR pa hetym pakazčyku ŭsio jašče značna adstaje ad dvuch lidaraŭ na rynku ŭzbrajeńniaŭ — ZŠA i Rasii. Na amierykanskuju zbroju prypadaje 31% suśvietnaha rynku ŭzbrajeńniaŭ, rasijskuju — 27%. Z 2010 hoda ekspart uzbrajeńniaŭ z hetych krain uzros, adpaviedna, na 23% i 37%.
SIPRI zvyčajna paraŭnoŭvaje abjomy ekspartu zbroi za piacihadovy pieryjad, pakolki hadavyja abjomy schilnyja da surjoznych vahańniaŭ.
