Z pačatku siezona z-za vypalvańnia suchoj raślinnaści ŭ Biełarusi zahinuła 14 čałaviek, paviedamiŭ na pres-kanfierencyi 7 krasavika ŭ Minsku načalnik upraŭleńnia nahladu i prafiłaktyki Ministerstva pa nadzvyčajnych situacyjach Uładzimir Rafalski.
Pavodle jaho słoŭ, kolkaść pažaraŭ u ekasistemach sioleta ŭ paraŭnańni z anałahičnym pieryjadam minułaha hoda vyrasła ŭ dva razy i skłała bolš za try tysiačy z-za raskładańnia vohniščaŭ, vypalvańnia suchoj raślinnaści, nieaściarožnaha abychodžańnia z ahniom, u tym liku ŭ lasach i na tarfianikach. Pry hetym pryblizna 50% pažaraŭ zdarylisia na terytoryjach nasielenych punktaŭ, 20% — sielskahaspadarčych pradpryjemstvaŭ i arhanizacyj.
Usiaho za apošnija piać hadoŭ (uklučajučy hety hod) ad vypalvańnia suchoj raślinnaści zahinuła 29 čałaviek, traŭmavanyja — 22.
«U asnoŭnym zahinułyja sioleta — heta ludzi, jakija vypalvali raślinnaść na svaich prysiadzibnych učastkach. Niekatoryja ličać, što vypalvańnie raślinnaści prynosić karyść ekasistemie, ale, naadvarot, jany nanosiać uron pryrodnym resursam i pryvodziać da hibieli ludziej, u asnoŭnym pažyłych. Jany pry spalvańni śmiećcia i suchoj raślinnaści nie ŭličvajuć umovy nadvorja, nie raźličvajuć siły, nie kantralujuć vohniščy. A kali situacyja vychodzić z-pad kantrolu, sprabujuć patušyć pažary, pabudovy i hinuć pry tušeńni takich pažaraŭ», — adznačyŭ Rafalski.
