Kramy, jakimi vałodajuć zamiežniki, padvierhlisia ŭ noč z čaćviarha na piatnicu napadam i rabunku ŭ paŭdniovaafrykanskim Jochanesburhu.
Palicyja ŭžyła ślezaciečny haz i humovyja kuli, kab razahnać vandałaŭ, u toj čas jak kala 200 čałaviek, hramadzian inšych krain, schavalisia ŭ adnym z palicejskich učastkaŭ. Pavodle dadzienych Frans pres, palicyja aryštavała 12 čałaviek.
Ksienafobski napad adbyŭsia praź niekalki hadzin paśla taho, jak u kurortnym horadzie Durban tysiačy ludziej vyjšli na mitynh suprać chvali ksienafobii, jakaja achapiła krainu.
Piać čałaviek zahinuli ŭ napadach, učynienych u apošnija tydni suprać zamiežnikaŭ, siarod zahinułych — dvoje zamiežnikaŭ i try hramadzianina Paŭdniova-Afrykanskaj Respubliki, uklučajučy 14-hadovaha chłopčyka.
Mnohija biespracoŭnyja paŭdniovaafrykancy vinavaciać zamiežnikaŭ u tym, što jany zachapili ich pracoŭnyja miescy, u toj čas jak biespracoŭje ŭ krainie dasiahnuła 24%.
U čaćvier pozna ŭviečary na ŭschodzie Jochanesburha natoŭp staŭ rabavać kramy, jakija naležać zamiežnikam. Byli taksama padpalenyja niekalki aŭtamabilaŭ i budynak, dzie pražyvajuć zamiežnyja hramadzianie.
Ciapierašni dziejny hubiernatar pravincyi Hautenh, centram jakoj źjaŭlajecca Jochanesburh, asudziŭ hvałt.
«My pavinny — kožny paŭdniovaafrykaniec, kamu darahi mir, — ustać i asudzić heta, — skazaŭ Kiedani Machłanhu. — Siońnia my nie možam skazać, što my chočam žyć u izalacyi, kali ŭvieś śviet hłabalizujecca».
Pa paviedamleńni Rejter, u piatnicu ŭ Jochanesburhu palicejskija razahnali hrupu zamiežnych hramadzian, uzbrojenych mačete dla samaabarony.
Prezident PAR Džejkab Zuma taksama raskrytykavaŭ tych, chto ździajśniaje ksienafobskija napady ŭ krainie.
«Ni pačućcio rasčaravańnia, ni pačućcio abureńnia nie mohuć apraŭdać napady na zamiežnikaŭ i spustašeńnie ich kramaŭ», — skazaŭ Zuma, źviartajučysia da parłamienta.
U toj ža čas karala zułu Hudviła Źvielicini abvinavačvajuć u tym, što jon svajoj zajavaj «zamiežniki pavinny źjazdžać da siabie dadomu» tolki raspaliŭ situacyju. Adnak sam karol zajaŭlaje, što jaho słovy byli skažonyja.
Palicyja arhanizavała kruhłasutačnyja centry chutkaha reahavańnia, kab zmahacca z napadami na zamiežnych hramadzian.
Z 2008 hoda pa mienšaj miery 62 čałavieki zahinuli ŭ Paŭdniovaj Afrycy ŭ takoha rodu napadach.
