Poŭnaściu adyści ad adklučeńnia ŭ letni pieryjad haračaj vady pry isnych schiemach ciepłazabieśpiačeńnia nie atrymajecca. Ab hetym paviedamiŭ na pres-kanfierencyi ŭ Minsku 17 červienia načalnik adździeła enierhietyki i navukova-techničnaha raźvićcia Ministerstva žyllova-kamunalnaj haspadarki Viačasłaŭ Šmit.
Pry hetym jon adznačyŭ, što ministerstvam štohod viadziecca praca pa skaračeńni terminu adklučeńnia haračaha vodazabieśpiačeńnia, ciapier maksimalny termin adklučeńnia składaje 14 dzion, adnak «u asobnych rajonnych centrach i rajonach Minska hetyja terminy ŭžo skaročanyja da 10 i 12 dzion».
Praces adklučeńnia haračaj vady ŭ žyłych damach źviazany ź nieabchodnaściu vyprabavańnia ciepłavych sietak, a taksama praviadzieńniem prafiłaktyčnych rabot na abjektach ciepłazabieśpiačeńnia: u kacielnych, centralnych i indyvidualnych ciepłavych punktach i niepasredna ŭ žyłych damach, rastłumačyŭ Šmit.
Pavodle jaho słoŭ, u haračavodnych sietkach idzie pastupovaja zamiena starych trub na novyja, vyrablenyja z šytaha polietylenu. «U pryvatnaści, truby aktyŭna zamianiajucca ŭ Minsku, dziakujučy hetamu adpadaje nieabchodnaść praviadzieńnia vyprabavańniaŭ ciepłavych sietak, bo truby z polietylenu nie schilnyja da karozii», — adznačyŭ načalnik adździeła Ministerstva ŽKH. Pry hetym poŭnaściu adyści ad adklučeńnia vady nie atrymajecca tamu, što «sam praces padrychtoŭki ŭsioj ciepłavoj haspadarki patrabuje niekatoraha času».
