Fota: Andrej Dyboŭski, «Hłobus Biełarusi».
Siadzibu Linova ŭ pasiołku Internacyjanalny Pružanskaha rajona znoŭ vystaviać na aŭkcyjon. Takaja infarmacyja prahučała 15 vieraśnia na siesii Pružanskaha rajonnaha Savieta deputataŭ, pryśviečanaj achovie historyka-kulturnaj spadčyny, paviedamili ŭ pieradačy rajonnaha radyjo 16 vieraśnia. Aŭdyjozapis pieradačy źmieščany na sajcie budni.by.
Fota: Andrej Dyboŭski, «Hłobus Biełarusi».
Siadzibu i kruchmalny zavod nabyŭ na aŭkcyjonie ŭ 2012 hodzie rasijanin Blinoŭ — adzin z uładalnikaŭ sumiesnaj biełaruska-rasijskaj firmy. Pavodle aficyjnaj infarmacyi, pradać zavod udałosia tady ź pieravyšeńniem startavaj cany ŭsiaho na 5%. Pryčym zachavanaść Linoŭskaj siadziby jak historyka-kulturnaj spadčyny, pomnika architektury XIX stahodździa, była adnoj z umoŭ prodažu.
U vyniku pravierki ŭstanoŭlena, što siadziba pa-raniejšamu znachodzicca ŭ vielmi kiepskim stanie. Jak paviedamiła na siesii namieśnik načalnika adździeła ideałahičnaj raboty, kultury i pa spravach moładzi Taćciana Jaroška, vyrašana adabrać siadzibu, bo ŭłaśnik nie maje srodkaŭ na jaje restaŭracyju, i vystavić siadzibu na novy aŭkcyjon.
Pry hetym nie prahučała, ci zastanucca va ŭłasnaści sumiesnaha pradpryjemstva budynki likvidavanaha kruchmalnaha zavoda. Čytačy sajta «Rajonnyja budni» ŭžo zadajuć pytańnie: «Siadzibu ŭ Internacyjanalnym pradali rasijaninu razam ź Linoŭskim kruchmalnym zavodam z umovaj, što rasijanin adrestaŭruje siadzibu. Jakoje ž prava hety rasijanin maje pakidać u svajoj ułasnaści budynak kruchmalnaha zavoda?»
***
Majontak Trambickich u pasiołku Internacyjanalny stvorany Vincentam Trambickim na miažy XVIII—XIX stahodździaŭ. Vincent Trambicki byŭ łoŭčym Kobrynskim i šambielanam Stanisłava Aŭhusta Paniatoŭskaha. Častkova zachavaŭsia i zakładzieny Vincentam Trambickim park, piša Anatol Fiedaruk u knizie «Staradaŭnija siadziby Bieraściejščyny», 2004 h.
