Homielski rajonny adździeł Śledčaha kamiteta pravodzić pravierku pa fakcie hibieli 64-hadovaha žychara vioski Cahielnia Homielskaha rajona. Jaho cieła było znojdzienaje ranicaj 3 śniežnia ŭ lesapałasie za nasielenym punktam ź irvanymi ranami na šyi i ŭ vobłaści pieradplečča.
Pavodle papiaredniaj infarmacyi, śmierć mužčyny nastupiła ad vialikaj straty kryvi ŭ vyniku paškodžańnia bujnych kryvianosnych sasudaŭ.
Jak paviedamiŭ namieśnik prakurora Homielskaha rajona Alaksandr Šynkaroŭ, ciapier pravodzicca histałahičnaje daśledavańnie, pa vynikach jakoha budzie nazvanaja dakładnaja pryčyna śmierci. Piensijanier pracavaŭ vartaŭnikom, i, jak miarkujecca, pry viartańni damoŭ sa źmieny na jaho napała zhraja badziažnych sabak.
Prakuratura ŭžo vydała pradpisańni słužbam «Śpieckamuntransa» i «Rajžyłkamhasa» zrabić zachady pa adłovie zhrai sabak. Taksama ŭ miascovuju arhanizacyju Biełaruskaha tavarystva palaŭničych i rybałovaŭ nakiravanaje chadajnictva ab pryniaćci mier pa adstrele niebiaśpiečnych žyvioł.
