Repier pradstaŭlaje trek «Kalada», jaki zapisaŭ sumiesna z vakalnaj častkaju hurta Shuma dla prajektu «Novaje pakaleńnie na Novy hod».
U kampazycyi spałučylisia rep-muzyka i folk-śpievy. Vinsent napisaŭ tekst dla kupletaŭ, a Šuma Voices u składzie Rusi, Nadziei Čuhunovaj i Julii Hibkoŭskaj ŭplali ŭ tvor tradycyjny kaladny napieŭ.
«My daŭno chacieli zrabić ź dziaŭčatami niešta supolnaje, – raspaviadaje reper. –A tut jakraz nam prapanavali razam padrychtavać trek da navahodniaha telešoŭ. Vidać, pradusary adčuli, što my pasujem adno da adnaho. Nie imknulisia da modnaści, ale atrymałasia aktualna. Dumaju, jakraz u hetym i sens, kab pakazvać narodnyja matyvy praz sučasnuju muzyku, sumiaščać hip-hap, folk i elektroniku – heta cikava hučyć i heta moža słuchać moładź, asabliva napiaredadni Kaladaŭ». Muzyka pryznajecca, što hetaje śviata jamu bližejšaje dy važniejšaje, čym ułasna Novy hod. I jon namahajecca jaho adznačać u kole siamji. U hetym ułasna i dadatkovy sens treka: «Było takoje, što ja nia moh adznačyć Kalady z rodnymi j navat sustrakaŭ u samocie daloka za miažoj. I ŭ hetaj pieśni jakraz apaviadaju toje, što bahata dzie pabyvaŭ i voś ciapier ja doma».
Udzielnicy Šuma Voices chutka spracavalisia ź Vinsentam. «Dla prafesyjanałaŭ heta nieskładana, – kaža śpiavačka Rusia. – Praviali čas my z uzajemnaj karyściu: Vinsent nam raskazaŭ kolki sakretaŭ čytki, a my jamu praviali karotki majstar-klas pa narodnych śpievach. Naohuł praca prajšła kamfortna, pryjemna, biaz ciažkaściaŭ. Adna asałoda!».
Akramia vakalistak «Šumy» u treku Vinsenta taksama paŭdzielničaŭ Pavał Ściepancoŭ (DJ Andy Roc). Pieśnia «Kalada» była zapisanaja dla prajektu «Novaje pakaleńnie na Novy hod». Videaversiju hetaha prajektu možna ŭbačyć u noč z 31 śniežnia 2015 na 1 studzienia 2016 hodu na telekanale «Biełsat».
