Pa dadzienych MNS rehijonu, biez dachaŭ zastalisia kala 30 žyłych damoŭ u Oršy, Viciebskim, Šumilinskim, Tałačynskim i Dubrovienskim rajonach. Paškodžany dach u Dubrovienskaj rajbalnicy. Žycharoŭ z paciarpiełych chat nie adsialali.
Nastupstvy niepahadzi likvidujuć bolš za 250 rabotnikaŭ roznych arhanizacyj, 83 adzinki techniki, u tym liku siły MNS. Asnoŭnyja darohi ad pavalenych drevaŭ užo rasčyścili.
Pa dadzienych «Viciebskenierha», adbyłosia avaryjnaje adklučeńnie 9 linij elektrapieradačy, 123 transfarmatarnych punktaŭ u Biešankovickim i Viciebskim rajonach. Tut abiastočany 52 nasielenyja punkty i fierma. Nastupstvy stychii likvidujuć 37 bryhad śpiecyjalistaŭ.
Orša
Partał orsha.eu aceńvaje siońniašni ŭrahan jak «samy mocny jak minimum za apošnija 50 hadoŭ» u Oršy.
Pavodle źviestak resursu, stychija ŭ asnoŭnym nakryła zachodniuju častku horada. Asabliva paciarpieŭ rajon kala doma sastarełych.
U Oršy paškodžany dachi mnohich damoŭ, viecier vyryvaŭ i łamaŭ drevy, valiŭ płaty, linii elektrapieradač.
Mocna paciarpieli i try vioski pad Viciebskam - Mazałava, Chajsy, Bukacina. U dvuch apošnich viecier pavaliŭ drevy, a ŭ Mazałavie častkova abo całkam źnios dachi 15 damoŭ, dach na fiermie pradpryjemstva «Mazałavahaz». Hety nasieleny punkt zastaŭsia bieź śviatła.
Na trasie Viciebsk — Haradok u rajonie vioski Chajsy viecier pavaliŭ sotni dreŭ. Rasčystkaj darohi zajmalisia supracoŭniki MNS.
