Minskaja haradskaja vybarčaja kamisija admoviła ŭ zadavalnieńni skarhi pretendenta ŭ deputaty Alesia Łahvinca na papiaredžańnie, vyniesienaje jaho inicyjatyŭnaj hrupie akruhovaj kamisijaj Sucharaŭskaj akruhi № 101.
Papiaredžańnie inicyjatyŭnaj hrupie było vyniesienaje 29 lipienia. Na dumku akruhovaj kamisii, hrupa parušyła patrabavańnie vybarčaha zakanadaŭstva ŭ častcy nievykanańnia abmiežavańniaŭ pry zbory podpisaŭ, «jakaja vyjaviłasia ŭ razdačy drukavanych materyjałaŭ vybarščykam padčas zboru podpisaŭ, a taksama ŭznaharodžańnia vybarščykaŭ za ŭniasieńnie podpisu ŭ padpisnyja listy».
U skarzie ŭ haradskuju kamisiju Łahviniec pakazaŭ, što ni jon, ni jaho inicyjatyŭnaja hrupa «nie ŭznaharodžvała vybarščykaŭ za padtrymku jaho vyłučeńnia ŭ deputaty». Pry hetym jon adznačaje, što ŭ rašeńni akruhovaj kamisii adsutničajuć źviestki, kim, kali mahło ažyćciaŭlacca takoje ŭznaharodžańnie, kolki čałaviek jaho mahli atrymać. Taksama Łahviniec patłumačyŭ, što nie moh prysutničać na ŭsich pikietach asabista, a tamu na ich razdavalisia jaho vizitki, kab hramadzianie pry žadańni mahli ź im źviazacca nie tolki jak z pretendentam u deputaty, ale i namieśnikam staršyni pravaabaronča-aśvietnickaha abjadnańnia.
Jak paviedamiŭ BiełaPAN Łahviniec, Minskaja haradskaja kamisija nie padtrymała jaho dovady. «U ich apynułasia šmat, vierahodna napisanych pad dyktoŭku administracyi rajona, skarhaŭ, u jakich ludzi skardziacca na pikiety i hetak dalej», — skazaŭ jon, vykazaŭšy zdahadku, što kandydatam u deputaty jaho naŭrad ci zarehistrujuć.
Adznačym, što inicyjatyŭnuju hrupu Łahvinca papiaredžvali jašče adzin raz — za ahitacyju 27 lipienia na pikiecie pa zbory podpisaŭ za vyłučeńnie kandydatam u deputaty ŭ staličnym mikrarajonie Sucharava, na jakim adbyŭsia paŭtarahadzinny kancert viadomaha rok-muzyki Lavona Volskaha.
Adznačym, dva papiaredžańni mohuć stać padstavaj dla admovy ŭ rehistracyi kandydatam u deputaty.
