Vałavy ŭnutrany pradukt Biełarusi ŭ studzieni—lipieni źniziŭsia na 2,7% i, pavodle źviestak BiełaPAN, skłaŭ 52,6 młrd. denaminavanych rubloŭ.
Varta adznačyć, što ŭ studzieni—lipieni mnohija makraekanamičnyja pakazčyki, jakija ŭpłyvajuć na dynamiku VUP, zastavalisia ŭ admoŭnaj zonie.
Tak, abjom pramysłovaj vytvorčaści skłaŭ 45,1 młrd. rubloŭ i skaraciŭsia na 2% u paraŭnańni z anałahičnym pieryjadam 2015 hoda. Inviestycyi ŭ asnoŭny kapitał za siem miesiacaŭ skłali 9,2 młrd. rubloŭ i skaracilisia na 20,6% u paraŭnańni z takim ža letašnim pakazčykam. Abjom žyllovaha budaŭnictva skłaŭ 2,4 młn. kvadratnych mietraŭ, źmienšyŭšysia amal na čverć. Abjomy roźničnaha i aptovaha tavaraabarotu taksama apynulisia bolš nizka, čym letaś. Tak, roźničny tavaraabarot u studzieni—lipieni skłaŭ 20,5 młrd. rubloŭ i źniziŭsia na 2,2%, aptovy tavaraabarot skłaŭsia na ŭzroŭni 37,8 młrd. rubloŭ i źmienšyŭsia na 8,2% u paraŭnańni sa studzieniem—lipieniem 2015 hoda.
Rost pakazčykaŭ u studzieni—lipieni byŭ zafiksavany tolki ŭ sielskaj haspadarcy. Za spravazdačny pieryjad vypusk sielskahaspadarčaj pradukcyi haspadarkami ŭsich katehoryj ułasnaści skłaŭ 6,2 młrd. rubloŭ i pavialičyŭsia na 4,2% u paraŭnańni z anałahičnym pieryjadam minułaha hoda.
Jak paviedamlałasia raniej, u druhim kvartale 2016 hoda ŭ Biełarusi nazirałasia pastupovaje skaračeńnie hłybini ekanamičnaha spadu. Tak, kali ŭ pieršym kvartale 2016 hoda vałavy ŭnutrany pradukt skaraciŭsia na 3,7%, to pavodle vynikaŭ pieršaha paŭhodździa — na 2,5%.
Razhladajučy 9 žniŭnia vyniki pracy ekanomiki za pieršaje paŭhodździe, premjer-ministr Andrej Kabiakoŭ zajaŭlaŭ, što ŭ krainie nazirajecca «adnaŭleńnie ekanamičnaha rostu». Aficyjny prahnoz, jaki raniej zaćvierdzili biełaruskija ŭłady, praduhledžvaje, što ekanomika vyjdzie sioleta z recesii i rost VUP składzie 0,3%.
Miž tym mižnarodnyja finansavyja arhanizacyi, jakija vystupajuć kredytorami Biełarusi, prahnazujuć, što recesija ŭ krainie ŭ 2016 hodzie zachavajecca. Mižnarodny valutny fond čakaje, što VUP Biełarusi ŭ 2016-m skarocicca na 3%, Jeŭrazijski bank raźvićcia prahnazuje, što ekanamičny spad u krainie składzie 1,9%.
