Kancler Hiermanii Anhieła Mierkiel uziała na siabie adkaznaść za projhryš svajoj partyi Chryścijanska-demakratyčny sajuz (CHDS) na vybarach u rehijanalny parłamient Bierlina. Pryznaŭšy, što palityka ŭrada ŭ adnosinach da mihrantaŭ stała faktaram u parazie, Mierkiel skazała, što nie viedaje, jakich pieramienaŭ u mihranckaj palitycy žadaje narod.
«Kali b ja mahła, ja b paviarnuła čas nazad — na šmat, šmat hadoŭ», — zajaviła Mierkiel, vykazaŭšy škadavańnie, što va ŭrada nie było bolšaha času, kab padrychtavacca da napłyvu mihrantaŭ u Jeŭropie.
«Kali b ja viedała, jakich mienavita pieramienaŭ u palitycy chočuć ludzi, ja była b hatova ich abdumać i abmierkavać», — skazała kancler, kamientujučy niadaŭniaje apytańnie, u jakim 82% respandentaŭ zajavili, što chacieli b ubačyć pieramieny ŭ mihracyjnaj palitycy ŭrada.
«Ale ŭ apytańni pra heta nie havorycca», — panarakała jana.
Na minułych vybarach u rehijanalny parłamient Bierlina partyja CHDS paciarpieła samuju surjoznuju parazu za apošnija 26 hadoŭ, nabraŭšy 17,6% hałasoŭ. Za tydzień da hetaha antyimihranckaja partyja «Alternatyva dla Hiermanii» apiaredziła CHDS na miascovych vybarach u ziamli Mieklenburh — Piaredniaja Pamieranija.
Na vybarach u Bierlinie za «Alternatyvu dla Hiermanii» prahałasavali 14% vybarščykaŭ. Partyja značna ŭmacavała pazicyi i, miarkujučy pa ŭsim, upieršyniu atrymaje miescy ŭ ziamielnym parłamiencie Bierlina.
Publikujecca ŭ miežach śpiecyjalnaj rubryki «Naviny Hiermanii»
