Na biełaruskuju pierakładzienaja jašče adna suśvietna viadomaja kniha — na hety raz «Karalina» Niła Hejmana. Hrupa entuzijastaŭ zaraz zajmajecca vydańniem tvoru i raspačała dziela hetaha kraŭdfandyhavuju kampaniju pa zbory srodkaŭ na partale talaka.by.
«Karalina» (pa-anhielsku Coraline) — dziciačaja apovieść, napisanaja ŭ 2002 hodzie brytanskim piśmieńnikam Niłam Hejmanam. Kniha atrymała šasnaccać prestyžnych litaraturnych premijaŭ, u tym liku premiju Chjuha za lepšuju apovieść, premiju Brema Stokiera za lepšy tvor dla maładych čytačoŭ i premiju Łokusa za lepšuju apovieść dla padletkaŭ. U 2009 hodzie pa apovieści byŭ źniaty multyplikacyjny film. Byŭ taksama pastaŭleny miuzikł i pabačyła śviet videahulnia pa matyvach apovieści. «Karalina» pierakładzienaja na 30 movaŭ, pa ŭsim śviecie pradadziena bolej za miljon asobnikaŭ hetaj knihi.
«Karalina» — heta kniha, katoruju chacieŭ by napisać kožny sučasny dziciačy piśmieńnik, ale Nił Hejman usich apiaredziŭ. Kali ja pračytała hetuju apovieść, pamiž nami zdaryłasia kachańnie ź pieršaha pohladu. Tady ja jašče nie viedała, što «Karalina» pierakładzienaja na 30 movaŭ i maje dziasiatki litaraturnych uznaharodaŭ. Ja prosta adrazu vyrašyła: «Budu pierakładać, bo nie pierakłaści nie atrymajecca!»» — adznačyła pierakładčyca knihi Darja Vaškievič.
«Biełaruskim dzieciam nie chapaje jakasnaj zachaplalnaj litaratury, jakaja b vychodziła za ramki «lasnych historyj» ci «dobrych vieršaŭ». Ciapierašnija płanšetna-smartfonavyja dzieci prahnuć avanturaŭ i tajamnicaŭ, jakija zdarajucca ź ich adnahodkami. I my chočam dać im mahčymaść spaznać fantastyčnyja pryhody dziaŭčynki Karaliny, jakimi zachaplajucca maładyja čytačy pa ŭsim śviecie», — raspavioŭ kaardynatar prajektu Siarhiej Lisičonak.
Pa siužecie knihi dziaŭčynka Karalina Džons traplaje ŭ inšy suśviet, u jakim jana sustrakaje padobnyja, ale i dziŭnavata adroznyja ad sapraŭdnych svoj dom, svaich maci i baćku. Cudoŭnaje padarožža chutka pieratvarajecca ŭ zmahańnie za prava zastacca saboj, za prava žyć, za mahčymaść vyratavać svaich baćkoŭ, za šaniec viarnucca. I raźličvać u hetaj baraćbie možna tolki na siabie. Nu i chiba na padkazki čornaha puchnataha Kata, ź jakim Karalinie davodzicca pasiabravać padčas svajoj vandroŭki pamiž suśvietami.
Kniha pa-biełarusku vydajecca z zachavańniem usich aŭtarskich pravoŭ. Pieramovy dziela hetaha doŭžylisia amal dva hady. Pa ŭmovach kantraktu, nadrukavanymi mohuć być usiaho tolki 500 ekzemplaraŭ knihi, tamu prajekt, na žal, zmoža paradavać tolki abmiežavanuju kolkaść čytačoŭ.
Ilustracyi da biełaruskaha vydańnia knihi namalavała mastačka i teatralnaja režysior Alena Miedziakova. Jany byli razhledžanyja samim aŭtaram apovieści, jaki i daŭ svaju zhodu na vykarystańnie vobrazaŭ. Niekalki hod tamu supolny tvor Darji i Aleny — ilustravanaja kazka «Bavaŭnianaja dziaŭčynka» — zaniaŭ druhoje miesca ŭ litaraturnym konkursie «Ekślibrys» imia Janki Maŭra.
Za navinami prajekta možna sačyć na staroncy kampanii ci ŭ fejsbuku. Pa pytańniach datyčna prajektu vydańnia knihi «Karalina» možna źviartacca pa emejłu [email protected] ci pa teł. 8 029 6050158 (kaardynatar Siarhiej Lisičonak).
