Tut i nižej fota: RAR
U Polščy prachodzić ahulnanacyjanalny strajk žančyn u ramkach tak zvanaha «Čornaha pratestu» suprać mahčymaj poŭnaj zabarony i kryminalizacyi abortaŭ.
Havorka idzie pra hramadzianski zakonaprajekt, jaki trapiŭ na razhlad u Siejm i jaki całkam zabaraniaje pierapynieńnie ciažarnaści. Siejm nakiravaŭ zakonaprajekt na dapracoŭku siejmavym kamisijam.
Pratest u Varšavie
U ramkach akcyi ŭ dzień pratestu žančyny apranajucca ŭ čornaje, a taksama nie iduć na pracu, karystajučysia pravam ŭziać dzień adpačynku pa ŭłasnym žadańni. Žančyn taksama padtrymali mužčyny. Pratesty prachodziać u Krakavie, Urocłavie, Hdańsku, Biełastoku, Ščecinie, Poznani i mnohich inšych haradach.
Pratest u Poznani
Pavodle infarmacyi ŭładaŭ Varšavy, u centry horada, niahledziačy na daždžlivaje nadvorje, sabralisia kala 30 tysiač čałaviek.
Pratest va Urocłavie
Pavodle acenak arhanizataraŭ, va Urocłavie na pratest vyjšli 20 tysiač čałaviek.
Akramia taho, pratesty prajšli ŭ jeŭrapiejskich haradach, naprykład u Paryžy, Brusieli, Bierlinie, Dublinie.
U toj ža čas pa ŭsioj krainie taksama prachodziać imšy i malitvy za ludziej, jakija prymajuć rašeńnie ŭ Polščy adnosna achovy čałaviečaha žyćcia. Arhanizatary malitvaŭ zaklikali prychodzić na imšu ŭ biełaj vopratcy.
Imša ŭ Łodzi
Pratesty suprać zabarony abortaŭ u Polščy praciahvajucca ŭžo bolš za tydzień — z taho času, jak Siejm Polščy prahałasavaŭ ŭ pieršym čytańni za zakonaprajekt ab poŭnaj zabaronie abortaŭ i ŭviadzieńni kryminalnaj adkaznaści za ich ździajśnieńnie.
U subotu ŭ Varšavie prajšoŭ maštabny «Čorny pratest», kali tysiačy žančyn sabralisia pad budynkam Siejma, kab vykazać svaju niazhodu z zakonaprajektam.