Śpiašajusia padzialicca svaimi nazirańniami. Pa-pieršaje, maleńkaja dziaŭčynka jaŭna vyhladała kantrastam na fonie adnahodkaŭ ź inšych krain — jak praviła, toŭstych buhajoŭ. Heta adrazu stvaryła nehatyŭny imidž našaj krainie — imidž krainy, dzie dzieci ledźvie nia puchnuć z hoładu ŭ vyniku ekanamičnaj palityki lubimaha prezydenta. Što, śpiavačka nie mahła, rychtujučysia da vystupu, sieści na adpaviednuju dyjetu? Mahła, adnak, zdajecca, chacieła naadvarot vyhladać, byccam blakadnica.
Ciapier zahlaniem u tekst pieśni. Jana całkam dvurušnickaja. Kožnaja fraza patychaje zamacham na kanstytucyjny ład našaj dziaržavy. Pieśnia pačynajecca słovami «My razam». Ci nie nahadvaje jana vam pierakaz viadomaha słohanu «Razam nas bahata i h.d.»? Ksienija nia tolki publična prapahandavała kaštoŭnaści «aranžavaj revalucyi», adnak jašče i ekspartavała ich na biełaruskuju hlebu.
Idziom dalej: «U domie pach chleba i parnoha małaka». Kožny zamiežny słuchač moža praciahnuć dedukcyjny łancužok lahičnych zaklučeńniaŭ: kali ŭ domie pachnie vyklučna takim niebahatym asartymentam, to biełaruskija siemji majuć vielmi prymityŭny spažyviecki nabor.
«Śviet taki pryhožy, jak farby viasiołki». Miž tym, kožnamu viadoma, što flah z kolerami viasiołki — heta brend pradstaŭnikoŭ seksualnych mienšaściaŭ. A kali vieryć centru «Jesoom», jakraz jany stvarajuć elektaralny kaściak apazycyi.
I narešcie, da čaho zaklikaje Ksienija ŭ svajoj pieśni? «Budziem ža siabrami». Chiba heta nia zaklik da stvareńnia niefarmalnych hramadzianskich inicyjatyŭ? Sapraŭdy, idealnaja madel, kab abyści zakon. Nakryvaje, skažam, AMON schod «Partnerstva», a bajeviki-pravaabaroncy na heta miantam kažuć: «A my nijakaja nie NDA, my prosta tak siabrujem».
I ŭžo nia budu padrabiazna analizavać finalnyja słovy — «Davajcie pamnožym śmiech, uśmieški i pieśni». Voś jana, žyćciovaja formuła darmajedaŭ, alkašoŭ i baćkoŭ kinutych kinderaŭ. Harłanić i davić łybu ŭ toj momant, kali nie zakončany adździełačnyja raboty ŭ «čupa-čupsie», prabačcie, u budynku Nacbiblijateki!.. Chiba heta nie kaščunstva?
Maju nadzieju, što vy budziecie dastojnymi praŭnukami Žaleznaha Feliksa i prymiecie nieabchodnyja miery, kab nia dać pašyrycca hanhrenie antydziaržaŭnaj prapahandy. Miarkuju, što paŭtara hodu turmy stanucca dobrym urokam dla maleńkaj dyskredytatarki našaj respubliki.
Zaŭsiody na varcie rašeńniaŭ 2-ha Ŭsiebiełaruskaha narodnaha schodu, vaš
