Dastatkova niečakana 45-m prezidentam ZŠA staŭ 70-hadovy miljarder Donald Tramp. Chto hety čałaviek, jaki navat dla amierykancaŭ zastajecca peŭnaj zahadkaj? «NN» sabrała cikavyja fakty ź bijahrafii biznesmiena i palityka.
Vypusknik Vajskovaj akademii
Padčas vučoby ŭ Vajskovaj akademii Ńju-Jorka.
Usie babuli i dziaduli Donalda Trampa naradzilisia ŭ Jeŭropie. U Šatłandyi naradziłasia i maci budučaha prezidenta Mery Makłaŭd (adrazu ŭzhadvajecca słavuty sieryjał «Horac» pra Dunkana Makłaŭda z kłana Makłaŭdaŭ). Baćka Fred Tramp naradziŭsia ŭ ZŠA, ale ŭ siamji vychadcaŭ z Hiermanii. Jany pražyli doŭhaje žyćcio: baćka — 94 hady, maci — 88. I pamierli na sutyku XX i XXI stahodździaŭ. Baćka mieŭ biznes pa prodažy nieruchomaści, a maci była chatniaj haspadyniaj.
Na śviet Tramp źjaviŭsia ŭ Kuinsie — heta častka Ńju-Jorka. Adna z samych šmatnacyjanalnych, ale nie takaja prablemnaja, jak Harlem ci Bronks. U 13 hadoŭ Tramp byŭ vymušany pakinuć škołu praz kiepskija pavodziny. Jamu nie pakinuli vybaru: chłopčyk idzie vučycca ŭ Ńju-Jorkskuju vajskovuju akademiju.
«Donald byŭ dastatkova hrubym chłopčykam u malenstvie», — kazaŭ jahony baćka.
U akademii Tramp dasłužyŭsia da zvańnia kapitana. Rodnyja śćviardžajuć, što mienavita tam chłopiec uziaŭsia za rozum, pierastaŭ być svavolnikam.
«Vajskovaja akademija dała mnie bolej, čym niekatorym słužba ŭ vojsku», — śćviardžaŭ jon.
Adzin z najbahaciejšych ludziej Amieryki
Razam z baćkam, 1970-ja.
U 1966 Donald pačynaje vučobu ŭ Uortenskaj biznes-škole pry Piensilvanskim univiersitecie. Paśla skančeńnia ŭstanovy baćka zabiraje syna ŭ siamiejny biznes. Užo pieršy prajekt Trampa pa budaŭnictvie žyłoha kompleksu ŭ Ahajo prynies prybytak kala 6 miljonaŭ dalaraŭ.
Donald chutka pačynaje ciamić, što, kab mieć jašče bolšyja prybytki, treba atrymlivać zamovy nie tolki ad dziaržavy, ale najpierš ad bahatych amierykancaŭ — biznesoŭcaŭ, bankiraŭ, zorak. Dziela hetaha małady pradprymalnik pierajazdžaje na Manchetan, dzie abrastaje novymi suviaziami i znajomstvami.
Pieršym sapraŭdnym pośpiecham Trampa było pierarabić zbankrutavały hatel «Kamador» u «Hrand-Chajat». Padčas hetaj rekanstrukcyi Donald dabiŭsia ad Ńju-Jorka lhotnych padatkaŭ na 40 hadoŭ. Heta byŭ pieršy chmaračos Trampa, jaki źmianiŭ vyhlad horada.
U 1983 hodzie nasuprać kramy «Tyfani» (toj samaj, pra jakuju pisaŭ Trumen Kapote ŭ svaim kłasičnym tvory «Śniadanak u Tyfani) paŭstaŭ chmaračos Trump Tower. Biznesoviec kazaŭ, što mienavita la hetaha miesca kruciacca samyja bahatyja ludzi Ńju-Jorka.
Potym Tramp zarablaŭ na hulniavym biznesie. Adnak u pačatku 90-ch biznesmen akazaŭsia na miažy bankructva. Pazyki składali kala 10 miljardaŭ dalaraŭ, ale dziakujučy ŭpartamu charaktaru ŭdałosia paźbiehnuć najhoršaha varyjantu.
Na siońnia majomaść Donalda Trampa aceńvajecca na 4,1 miljardy dalaraŭ.
Žonka-supiermadel, maładziejšaja na 24 hady
Razam z žonkaj Miełani.
Pieršaj žonkaj biznesmena była čechasłavackaja supiermadel i łyžnica Ivana Zielničkava. U šlubie jany pražyli 15 hadoŭ, u pary naradziłasia troje dziaciej — Donald, Eryk i Ivanka. U 1992 Ivana padaje na razvod, daviedaŭšysia, što muž mietadyčna i pastajanna zdradžvaje joj.
Jana zmahła adsudzić u Trampa 25 miljonaŭ dalaraŭ, raskošnuju viłu, a taksama 650 tysiač dalaraŭ štomiesiac na ŭtrymańnie traich dziaciej. Da Ivany takoha ščodraha vyniku razvodu nie było ni ŭ adnoj žančyny ŭ śviecie.
Paśla hetaha Ivana jašče niekalki razoŭ vychodziła zamuž. Pryčym adzin ź jaje mužčyn byŭ na 24 hady maładziejšym.
Sam Tramp nie nadta adstavaŭ ad svajoj byłoj žonki. U 1990-ch u jaho byŭ niepraciahły šlub z aktrysaj Marłaj Mejpłz, vynikam jakoha stałasia dačka Tyfani.
U 2004 Donald Tramp ažaniŭsia sa słavienskaj fotamadellu Miełani Knaŭs, jakaja maładziejšaja za miljaniera na 24 hady. U pary jość 10-hadovy syn Beran Uiljam.
U žyćci miljaniera było taksama niamała inšych žančyn, absalutnaja bolšaść ź jakich była madelami.
Z usich dziaciej Trampa najbolš na vidu dačka Ivanka — biznesvumen i piśmieńnica. Jana aktyŭnaja ŭ sacyjalnych sietkach, a taksama ŭdzielničała ŭ vybarčaj kampanii ŭ padtrymku baćki.
Zaŭsiody traplaje ŭ skandały
Donald Tramp maje redkuju zdolnaść pryciahvać da siabie ŭsialakija skandały. Zdajecca, na hetaha čałavieka navat nie patrebna było źbirać kampramat, bo ŭvieś jon i tak navidavoku.
Najbolšy rezanans atrymała jahonaja zajava ab budaŭnictvie ściany na miažy ZŠA ź Mieksikaj. Takim čynam, Tramp hraje na ksienafobii peŭnaj častcy hramadzian, jakaja vinavacić va ŭsich svaich prablemach mihrantaŭ. Toje samaje tyčycca i musulman, zabaronu na ŭjezd u krainu jakich prapanoŭvaŭ kandydat.
U svaich vyrazach u dačynieńni žančyn Tramp taksama nie strymlivaŭsia. Kahości jon nazyvaŭ «pustyškaj», kahości — «urodzinaj», inšuju — «śvińnioj», čaćviortuju — «sučkaj».
«Kali ty zorka, ty možaš rabić ź imi ŭsio», — kazaŭ Tramp pra adnosiny z žančynami.
U kastryčniku jon abiacaŭ pasadzić u turmu kandydatku ŭ prezidenty Chiłary Klintan. Ale paśla pieramohi vysoka acaniŭ jaje zasłuhi pierad Amierykaj.
Staŭleńnie da Biełarusi i Rasii
Pucin i Tramp. Słavutaje hrafici ŭ Vilni.
U Rasii pieramohu Trampa ŭspryniali ź vialikim entuzijazmam. Na dumku šmat kaho z analitykaŭ, pieramoha kandydata ad Respublikanskaj partyi moža pryvieści da palapšeńnia adnosin pamiž ZŠA i Rasijaj.
Što kazaŭ Tramp pra Rasiju? «Ja dumaju, što budu vydatna ładzić z Uładzimiram Pucinym, mnie tak zdajecca», — kazaŭ jon.
«Kali b my zmahli paładzić z Rasijaj, to heta było b prosta vydatna», — heta taksama cytata z Trampa.
Što tyčycca Biełarusi, to temu našaj krainy novy prezident ZŠA nie ŭzdymaŭ nikoli. Adzinaje, što jaho źviazvaje ź Biełaruśsiu — heta muž Ivanki Džared Kušnier. Ziać Trampa pachodzić karaniami ź biełaruskaha Navahrudka. Sam Kušnier byvaŭ u Biełarusi.
Zamiest bonusa
Hlańcie, u jakim filmie źniaŭsia Donald Tramp u svoj čas.
