Pryvatnaje vydaviectva «Łohvinaŭ» maje namier da maja 2017 hoda vypuścić sieryju pierakładaŭ na biełaruskuju movu piaci tvoraŭ letašniaha nobieleŭskaha łaŭreata pa litaratury piśmieńnicy Śviatłany Aleksijevič, paviedamiŭ dyrektar vydaviectva minski pradprymalnik Ihar Łohvinaŭ.
«My vielmi doŭha šukali šlachi, daŭno chacieli zrabić novyja pierakłady, jakija byli b biez kupiur, sučasnyja, — adznačyŭ jon. — I sama Aleksijevič pra heta dumała i vielmi chacieła, kab knihi vyjšli na biełaruskaj movie, tamu pajšła nam nasustrač — za prava pierakładu my nie płacim».
Pavodle słoŭ Łohvinava, u biełaruskamoŭnaj sieryi vyjduć knihi «U vajny nie žanočy tvar», «Cynkavyja chłopčyki», «Apošnija śviedki», «Čarnobylskaja malitva» i «Čas sekand-chend», pierakładam jakich zajmajucca piśmieńnik Uładzimir Arłoŭ, žurnalist i publicyst Siarhiej Dubaviec, fiłosaf Valancin Akudovivič, kiraŭnik Biełaruskaha PEN-Centra paet i pierakładčyk Andrej Chadanovič i staršynia Sajuza biełaruskich piśmieńnikaŭ Barys Piatrovič. Pradprymalnik rastłumačyŭ, što pierakładčykaŭ prapanavała vydaviectva, a Aleksijevič zaćvierdziła ich kandydatury.
«Praź miesiac ci paŭtara pierakładčyki zdaduć svaje raboty, zatym pačniecca doŭhi etap redaktury, karektury i padrychtoŭki da druku. Pierakład viadziecca paralelna ŭsich piaci knih. My chočam vypuścić ich usie razam», — skazaŭ uładalnik vydaviectva.
Vypusk hetaj sieryi, skazaŭ jon, budzie kaštavać «Łohvinavu» prykładna 38 tysiač dalaraŭ u ekvivalencie.
