22 śniežnia Kurhanski abłasny sud paćvierdziŭ prysud vychavalnicy dziciačaha sada Jaŭhienii Čudnaviec — jana praviadzie piać miesiacaŭ u kałonii za raspaŭsiud dziciačaj parnahrafii. Złačynstva Čudnaviec ŭ tym, što jana reposnuła videa «Ukantakcie», kab pryciahnuć uvahu da ździekavańniaŭ ź dziaciej. Dziakujučy hetamu videa ludziej, jakija ździekavalisia z 10-hadovaha chłopčyka, udałosia pryciahnuć da adkaznaści. «Mieduza» koratka pierakazvaje rasśledavańnie žurnalista «Miediazony» Mikity Sałahuba, jaki padrabiazna razabraŭsia ŭ hetaj spravie.
Fota Jaŭhienii Čudnaviec z «Ukantakcie»
Historyja videarolika z małaletnim chłopčykam pačałasia ŭ žniŭni 2015 hoda ŭ horadzie Katajsk Kurhanskaj vobłaści. 23-hadovaja vychavalnica dziciačaha łahiera «Čyrvonyja arły» Taćciana Kuršava adpačyvała ź siabroŭkaj u kafe i zabyłasia ŭ ustanovie svoj telefon. Jaho potym znajšoŭ miascovy student Kim Danielan, jaki z dapamohaj baćki Ernsta pasprabavaŭ vyśvietlić, kamu naležaŭ aparat. Na karcie pamiaci jany znajšli trochsiekundnaje videa z hołym chłopčykam.
«U jaho byli pryspuščany štany i trusy, źvierchu na im była nadzieta niejkaja kofta ciomnaha koleru, pry hetym było vidać, što chłopčyk nachiliŭsia krychu napierad, a ŭ analnaj adtulinie ŭ hetaha chłopčyka znachodziŭsia niejki pradmiet, padobny da ałoŭka», — potym raspavioŭ Ernst Danielan na dopycie śledčaha.
Danielan pasprabavaŭ źviazacca z Kuršavaj praz «Ukantakcie». Jon pierasłaŭ joj videazapis u čacie, ale dziaŭčyna admoviłasia ź im mieć znosiny. Zatoje rolik, jaki źjaviŭsia ŭ raździele «Maje videa», zaŭvažyła inšaja žycharka Katajska, vychavalnica Jaŭhienija Čudnaviec. Videa tak jaje aburyła, što jana vyviesiła jaho ŭ svajoj supołcy, dzie było 288 čałaviek. Mienavita tam trochsiekundny rolik zaŭvažyŭ supracoŭnik miascovaha adździeła palicyi. Paśla hetaha Čudnaviec vydaliła rolik pa paradzie siabroŭki.
Nieŭzabavie była zaviedzienaja kryminalnaja sprava pa hvałtoŭnych dziejańniach suprać niepaŭnaletniaha. Kuršava i važaty łahiera Danił Biezbarody, jaki byŭ u pakoi padčas zdymki videa, zajavili, što 10-hadovy vychavaniec sam vyrašyŭ zasunuć ałovak u anus, a jany prosta apynulisia pobač. Repliku «Hladzi, na ciabie hladzić usia kraina!», jakaja prahučała ŭ kadry, dziaŭčyna nazvała žartam. Dzicia na dopycie raspaviało, što ałovak ustavili vychavalniki, jakija sistematyčna ź jaho ździekavalisia.
Amal praz hod paśla straty telefona, u červieni 2016-ha, sud pryznaŭ Kuršavu i Biezbarodava vinavatymi ŭ hvałcie ź dziciaci i vyrabie parnahrafii. Vychavalnica atrymała šeść hadoŭ kałonii, važaty — try hady.
Praź miesiac paśla prysudu Čudnaviec raptam vyśvietliła, što ŭžo paŭhoda idzie rasśledavańnie pa druhoj spravie — na hety raz užo jaje padazravali ŭ raspaŭsiudzie parnahrafii. Da zaviaršeńnia pieršaj spravy joj nijak pra heta nie paviedamili, ale potym u śledstva źjaviŭsia važki arhumient: parnahrafičny charaktar videa ŭžo zamacavany ŭ prysudzie suda. Usie ekśpiertyzy byli aŭtamatyčna dałučanyja da novaha rasśledavańni, i ŭžo ŭ pačatku listapada Čudnaviec prysudzili da paŭhoda kałonii, a jaje trochhadovaha syna vyrašyli addać orhanam apieki.
Realny termin dla žančyny, jakaja sprabavała pryciahnuć uvahu da ździekavańniaŭ ź dziciaci, vyklikaŭ vialiki rezanans. Spravu asudziła ŭpaŭnavažanaja pa pravach dziciaci Hanna Kuźniacova: «Što za rašeńnie takoje: čałaviek, jaki spryjaŭ raskryćciu złačynstva, panios jašče i adkaznaść, i jaje ŭłasnaje dzicia akazałasia na miažy dziciačaha doma?!» Kiraŭnik SK Alaksandr Bastrykin zapatrabavaŭ pravieści pravierku. Nieŭzabavie paśla hetaha navat abvinavačańnie paprasiła apielacyjnuju instancyju zamianić pakarańnie Čudnaviec, a nie adpraŭlać jaje ŭ kałoniju.
Ni chadajnictva abvinavačvańnia ab zamienie terminu na papraŭčyja raboty, ni prośba abarony apraŭdać Čudnaviec nie paŭpłyvali na rašeńnie suda. Jon admianiŭ rašeńnie addać syna Čudnaviec u prytułak, ale termin dla samoj abvinavačvanaj źniziŭ tolki na miesiac. Ciapier advakaty majuć namier źviarnucca ŭ JESPČ.
«Pakazańni, dadzienyja mnoju ŭ chodzie rasśledavańnia kryminalnaj spravy [u dačynieńni da Kuršavaj i Biezbarodava], paćviardžaju ŭ poŭnym abjomie, da ich mnie dadać niama čaho. Žadaju, kab Čudnaviec, jakaja raźmiaściła maje zdymki ŭ sietcy internet, pryciahnuli za heta da vyznačanaj zakonam adkaznaści», — tak, pavodle pratakoła, zajaviŭ śledčamu 10-hadovy chłopčyk.
