Pra heta paviedamiŭ siońnia ŭ pres-centry BiełTA na bryfinhu pa likvidacyi nastupstvaŭ cykłona «Aksiel» načalnik słužby hidramietearałahičnych prahnozaŭ Respublikanskaha centra pa hidramietearałohii, kantroli radyjeaktyŭnaha zabrudžvańnia i manitorynhu navakolnaha asiarodździa Minpryrody Dźmitryj Rabaŭ.
fota Julii Balcevič
«Kali kazać pra nadvorje ŭ studzieni, to heta nie apošni cykłon. U biahučym miesiacy my čakajem niaŭstojlivy charaktar nadvorja: pieryjady adlihi buduć źmianiacca marazami. U lutym nas taksama čakajuć śniehapady i mocny paryvisty viecier», — rastłumačyŭ sinoptyk.
Dźmitryj Rabaŭ źviarnuŭ uvahu, što cykłon, padobny «Aksielu», nielha sprahnazavać za miesiac napierad — aptymalny termin prahnozaŭ 3-4 sutak. «Naprykład, «Daniełu» letaś my ŭbačyli za try dni. Vyklučać źjaŭleńnie novych cykłonaŭ hetaj zimoj nijak nielha, zima, u pryncypie, da nas tolki pryjšła, bo śniežań byŭ anamalna ciopłym. Da taho ž cykłony aktyvizujucca ŭ zimovy pieryjad», — paviedamiŭ jon.
Pa słovach sinoptyka, kožny cykłon maje svoj charaktar i trajektoryju. «Paraŭnoŭvać «Aksiel» z «Daniełaj», «Emaj» abo «Chaŭjeram» ni ŭ jakim vypadku nielha, tamu što situacyja z nadvorjem ciapier zusim inšaja», — kanstatavaŭ jon.
Pry hetym sinoptyk adznačyŭ, što nazvać anamalnym nadvorje apošnich dzion i prahnazavanyja marazy nielha. «My prosta krychu advykli ad hetaha, ale dla Biełarusi charakterny niaŭstojlivy charaktar nadvorja, kali adližnaje nadvorje źmianiajecca maroznym, kali z poŭnačy i paŭnočnaha ŭschodu prychodzić chałodnaje pavietra i tempieratura pavietra apuskajecca da minus 22-30 hradusaŭ. Heta narmalna, ale ŭ suviazi z paciapleńniem takija marazy ŭžo vialikaja redkaść», — padkreśliŭ jon, dadaŭšy, što siaredni pieryjad takich maroznych dzion składaje 5-7 dzien.
