Jak nie pamylicca, abirajučy hurtki dla dziciaci? Jak, naohuł, nie vypuścić z-pad uvahi zdolnaści dački ci syna, jakija mohuć stać vyznačalnymi dla ich žyćcia?
Mnahadzietnaja maci, a taksama viadučaja hrupavych zaniatkaŭ ŭ Sietcy centraŭ dziciačaha raźvićcia «Bebi-Kłab», piedahoh-psichołah z 15-hadovym dośviedam Śviatłana Lipkina dapamahła nam skłaści TOP samych raspaŭsiudžanych mifaŭ, u jakija časta nieapraŭdana vierać baćki.
6. Razhledzieć zdolnaści dziciaci ŭ pieršyja hady niemahčyma, usie dzieci adnolkavyja
Mnohija zdolnaści i schilnaści dziciaci vyjaŭlajucca ŭžo va ŭzroście da 3-ch hadoŭ, i ŭvažlivaja mama musić heta ŭbačyć. Važna nazirać za dziciom, prapanoŭvajučy jamu roznyja vidy dziejnaści, źviartajučy ŭvahu na toje, da čaho ŭ jaho prajaŭlajecca maksimalny intares. Čym vašaja maleča hatova zajmacca doŭha i z radaściu? Heta i jość toj kirunak, u jakim varta było b raźvivacca.
Nie zabyvajciesia, što dla dziciaci na pieršych hadach žyćcia pry luboj dziejnaści vielmi važnaja emacyjnaja reakcyja mamy. Z adnaho boku, maci emacyjna «zaražaje» svajo dzicia ŭłasnymi intaresami. Naprykład, kali jana ŭ zachapleńni ad muzyki, budzie padpiavać ŭ mašynie pieśni ci tančyć, heta, biezumoŭna, uzmocnić i muzyčny impet dziciaci. Ź inšaha boku, dzicia niby testuje matulinu reakcyju: što ź jaho dziejnaści maci padmacoŭvaje svajoj pazityŭnaj uvahaj (vopleskami, uśmieškaj, pachvałoj) …
5. Dziciačyja raźvivalnyja centry dzieciam nie patrebny, usio toje ž samaje možna rabić i doma
Možna, ale składana. I efiekt małaimavierny. Prapanavać doma mnostva vidaŭ dziejnaści ź vialikaj kolkaściu navučalnych materyjałaŭ i ŭ asiarodździ inšych dziaciej, a nie tolki piedahohaŭ i mamy, składana. Dziciačyja centry — heta, pa sutnaści, rańniaja dyjahnostyka i mahčymaść dać dziciaci raznastajny dośvied. A jašče centry — heta i škoła dla maci, dzie jana moža ŭbačyć i zrazumieć, čym zajmacca ź dziciem, i pasprabavać usie hetyja vidy dziejnaści.
Jość mamy, jakija adnosiacca da chatnich zaniatkaŭ vielmi surjozna. A dzicia pratestuje. Jano choča hulać. U raźvićciovym centry paznavalnuju dziejnaść piedahoh moža prapanavać u vyhladzie hulni i navučyć hetamu mamu.
4. Pryjšoŭšy na zaniatki, dzicia adrazu vyjaŭlaje svaje zdolnaści
Nie zaŭsiody i nie ŭsie dzieci zdolnyja ź pieršaha ž zaniatku prajavić siabie. Mnohija pryhladajucca i bolš-mienš raźniavolena siabie adčuvajuć tolki na trecim-čaćviortym zaniatku. Taksama važna hladzieć na stasunki dziciaci i piedahoha. Kahości moža adšturchnuć hučnaść hołasu piedahoha, u niekaha moža nie supaści emacyjny fon, a chtości prosta budzie napružana stavicca da žančyn-brunietak, ale radasna biehčy zajmacca da śvietłavałosaha piedahoha. Dla dziaŭčynak, naprykład, vielmi važna, kab zaniatki viała maładaja žančyna ŭ pryhožaj sukiency. Da takoj jany značna bolš achvotna iduć na kantakt. Zaŭsiody varta hladzieć na reakcyju dziciaci.
Kali zaniatki «nie iduć» paśla 1-2 miesiacaŭ sprobaŭ, maje sens zadumacca pra źmienu piedahoha abo miesca zaniatkaŭ. Uzhadajcie: u škole nam tyja pradmiety davalisia lohka i cikava, jakimi moh zacikavić nas kankretny nastaŭnik — čałaviek, jaki byŭ nam cikavy i vyklikaŭ davier.
Piedahoh, jaki viadzie niekalki hrup i adnačasova bačyć 30-40 dzietak adnaho ŭzrostu, zdolny razhledzieć zdolnaści dziciaci i paraić baćkam, u jakim kirunku raźvivacca. Skažam, dzieci tolki pačynajuć rabić prostyja skački na miescy, a niechta z hrupy skača vielmi vysoka, pieraskokvaje pieraškody, tady piedahoh rekamienduje zaniatki, źviazanyja z ruchalnaj aktyŭnaściu i sportam.
3. Tanny dziciačy centr prynosić stolki ž karyści, kolki i darahi
U darahich centrach, jak praviła, pracujuć bolš daśviedčanyja piedahohi. U ich maleńkija hrupy: naprykład, pa 6 čałaviek zamiest 12-14. A čym mienš dziaciej u hrupie, tym lahčej piedahohu nadać indyvidualnuju ŭvahu kožnamu, adšukać indyvidualny padychod. Dadajcie da hetaha košt «raschodnikaŭ» i navučalnych materyjałaŭ, apłatu arendy pamiaškańniaŭ. Atrymlivajecca, što biaspłatnymi abo vielmi tannymi takija zaniatki ŭ pryncypie być nie mohuć.
Miž tym, razumnyja dyrektary centraŭ, ustanaŭlivajučy ceny na zaniatki ŭ hrupach ź dziećmi samaha rańniaha ŭzrostu, uličvajuć, što zvyčajna ŭ siemjach z małymi dziećmi zarablaje tolki baćka, a značyć, biudžet abmiežavany.
2. Kali dzicia kapryzić i nie choča zajmacca, nie varta źviartać na heta ŭvahi. Treba pieraciarpieć, bo dyscyplina ŭ zaniatkach važnaja nie mieniej za ich źmiest
Heta ŭ korani niapravilnaje ŭjaŭleńnie, jakim, na žal, «hrašać» mnohija biełaruskija baćki. Dzicia nie treba vadzić na zaniatki, kali jamu niecikava! Baćkoŭskija ambicyi i pierfiekcyjanizm mam nie pavinny pazbaŭlać maleču dziacinstva i pazityŭnych emocyj. Adna sprava — chadzić časam z mamaj u basiejn pluchacca ŭ svajo zadavalnieńnie, a zusim inšaje — zajmacca tam rehularna pad kiraŭnictvam treniera, jaki niečaha patrabuje i pastajanna paraŭnoŭvaje ciabie ź inšymi dziećmi. Heta padychodzić nie kožnamu.
Darečy, mnohija taty i mamy błytajuć svaje baćkoŭskija ambicyi z patrebami dziciaci. Vielmi niaprosta baćkam adsačyć, kali ich žadańnie advieści dzicia ŭ peŭny hurtok źviazana z mahčymaściami i intaresami dziciaci, a kali vynikaje z ułasnaj junackaj nierealizavanaści. U hetym moža dapamahčy sapraŭdnaja blizkaść sa svaim dziciem, daviernaść, kali dzicia moža dzialicca z baćkami svaimi strachami, žadańniami, marami, i viedaje, što jaho zrazumiejuć i padtrymajuć.
1. Dzicia pavinna raźvivacca harmanična. Kali jano maje pośpiechi ŭ fizičnym raźvićci, treba daciahvać da vysokaha ŭzroŭniu intelektualny składnik i naadvarot
Heta viadomy mif, jaki skłaŭsia jašče ŭ savieckaj piedahohicy. Tady ličyłasia, što dzicia pavinna być usiebakova raźvitym i paśpiachovym va ŭsim. A chiba moža być dzicia adnolkava paśpiachovam va ŭsich śfierach adrazu? Heta ŭtopija.
Mnohija baćki, asabliva minčuki, ličać, što dzieci abaviazkova pavinny naviedvać spartovyja siekcyi, intelektualnyja treniroŭki, vyjaŭlenčaje mastactva, basiejn, teatralnuju studyju. U vyniku my majem vysokija baćkoŭskija čakańni ad dziaciej i mnostva nieŭrałahičnych i psichałahičnych prablem pierahružanych dziaciej. My zabyvajemsia, što siekcyi i zaniatki nie pavinny padmianiać siamju. Dzicia pavinna žyć u siamji, a nie ŭ sadku ci raźvivajučych zaniatkach. Zaŭsiody musić być čas pahulać, adpačyć, pahavaryć i prosta pabyć ź siamjoj.
Rejtynh składzieny na padstavie infarmacyi i nazirańniaŭ ekśpiertaŭ sietki centraŭ dziciačaha raźvićcia «Bebi-Kłab». Biezumoŭna, niechta moža nie pahadzicca ź im. U kožnaha svaja škała pieravahaŭ, svaje mify i svaja viera ŭ ich. U lubym vypadku nie zabyvajciesia: baćkoŭskija pamyłki niepaźbiežna adbivajucca na losie dziciaci.
