Sučasnyja futbolnyja maniežy buduć pabudavany va ŭsich abłasnych centrach. Ab hetym siońnia ŭ čas adkryćcia futbolnaha manieža ŭ Hrodnie paviedamiŭ staršynia asacyjacyi «Biełaruskaja fiederacyja futboła» Siarhiej Rumas.
«Heta pieršy abjekt pa zaćvierdžanaj fiederacyjaj futboła prahramie. Takija dobryja sučasnyja maniežy pavinny źjavicca ŭ kožnym abłasnym centry, a taksama jašče adzin u Minsku», — skazaŭ Siarhiej Rumas. Nastupnym horadam stanie Brest. U hod fiederacyja płanuje adkryvać pa adnym takim maniežy.
«Naša kraina nie moža pachvalicca kruhły hod dobrym nadvorjem dla taho, kab hulać u futboł. Tamu składana pieraacanić značnaść takich zbudavańniaŭ. Hety padarunak, jaki fiederacyja razam z horadam i vobłaściu robiać dla ŭsich žycharoŭ Hrodna, — dobraje paćviardžeńnie, što my vialikuju ŭvahu ŭdzialajem raźvićciu mienavita futbolnaj infrastruktury», — adznačyŭ Siarhiej Rumas.
Futbolny maniež uźviedzieny ŭ hrodzienskim lesaparku Pyški na miescy byłoha dziciačaha azdaraŭlenčaha łahiera. Pobač raźmieščany i kryty ladovy katok. Pabudavany abjekty pa adnym pryncypie: spartyŭnuju placoŭku nakryvaje kupał. Ścienami i dacham tut vystupaje tak zvanaja pavietraapornaja kanstrukcyja. Unutry standartnaje štučnaje pole z pakryćciom apošniaha pakaleńnia.
Prybudavany da manieža i kompleks budynkaŭ ź nieabchodnymi pamiaškańniami: raździavałkami, trenierskimi, vučebnymi kłasami, kafe, harderobnymi i inšymi. Realizavany prajekt sumiesnymi namahańniami. Asacyjacyja «Biełaruskaja fiederacyja futboła» pradastaviła samo zbudavańnie, a ŭsie sietki, asnova dla kanstrukcyi — za košt haradskoha biudžetu. Sumarny košt abjekta skłaŭ kala 1,2 młn jeŭra.
«Z uviadzieńniem hetaha manieža junyja futbalisty atrymajuć mahčymaść zajmacca kruhły hod niezaležna ad umoŭ nadvorja ŭdaskanalvać svajo majsterstva. I, upeŭnieny, tut užo zajmajucca tyja, chto budzie abaraniać kolery i zbornaj Biełarusi pa futbole», — dadaŭ jon.
Maniež budzie naležać futbolnaj škole FK «Nioman». Niahledziačy na toje što maniež tolki ŭviedzieny ŭ ekspłuatacyju, raskład zaniatkaŭ vielmi ščylny. Zadziejničany jon budzie z ranicy da samaha viečara.
