Minski haradski sud prysudziŭ byłoha hienieralnaha dyrektara DVA «Minskbud» da piaci hadoŭ pazbaŭleńnia voli z adbyvańniem pakarańnia ŭ kałonii ŭzmocnienaha režymu, pieradaje BIEŁTA.
Sud pryznaŭ jaho vinavatym u naŭmysnym, nasupierak intaresam słužby, učynieńni słužbovaj asobaj z karyślivaj i inšaj asabistaj zacikaŭlenaści dziejańniaŭ z vykarystańniem svaich słužbovych paŭnamoctvaŭ, jakija paciahnuli pryčynieńnie istotnaj škody dziaržaŭnym intaresam i ciažkija nastupstvy. U jaho kanfiskujuć majomaść i pazbaviać prava zajmać peŭnyja pasady terminam na piać hadoŭ.
Siarod inšych fihurantaŭ spravy — były pieršy namieśnik hiendyrektara, jaki ŭ niekatoryja pieryjady času taksama byŭ vykonvajučym pasadu hiendyrektara. Jaho prysudzili da 3,5 hadoŭ pazbaŭleńnia voli z adbyvańniem pakarańnia ŭ kałonii ŭzmocnienaha režymu. Jon byŭ uziaty pad vartu ŭ zale suda. Načalnik adździeła i jaje namieśnik asudžanyja na try hady pazbaŭleńnia voli z adterminoŭkaj asnoŭnaha i dadatkovaha pakarańnia na termin dva hady. Što tyčycca hałoŭnaha buchhałtara, jana apraŭdanaja pa č. 3 art. 426, ale ŭ ciapierašni čas adbyvaje pakarańnie za inšyja złačynstvy pa prysudzie suda Partyzanskaha rajona, jaki ŭ 2015 hodzie pryznačyŭ joj dzieviać hadoŭ pazbaŭleńnia voli.
Kryminalnaja sprava raspačynałasia na padstavie materyjałaŭ apieratyŭna-vyšukovaj dziejnaści i daśledčaj pravierki HUBEZ KM MUS Biełarusi i UBEP KM HUUS Minharvykankama. Sumiesnyja pravieračnyja mierapryjemstvy pravodzilisia z 2013 pa 2014 hod. Jak vyjaŭlena śledstvam, byłyja top-mieniedžary hetaj arhanizacyi z žniŭnia 2009 pa vierasień 2010 hoda pry ažyćciaŭleńni abjadnańniem funkcyj zakazčyka budaŭnictva złoŭžyli słužbovymi paŭnamoctvami i pieravysili ich, što paciahnuła pryčynieńnie škody na sumu zvyš Br17 młrd (da denaminacyi), a taksama pryčynieńnie istotnaj škody dziaržaŭnym intaresam i intaresam DVA «Minskbud».
Paciarpiełymi pa kryminalnaj spravie prachodzili bolš za 500 čałaviek.
