U Leninhradskaj vobłaści RF kiroŭca ŭsiedarožnika «ŭ vychavaŭčych metach» najechaŭ na chłopčyka, jaki celiŭsia ŭ jaho mašynu z cacačnaha aŭtamata, a zatym prymusiŭ jaho prastajać 15 chvilin na kaleniach. Paśla incydentu ŭ 9-hadovaha chłopčyka zafiksavali strasieńnie mozhu i ŭdary. «Vychavalnikam» akazaŭsia miascovy pradprymalnik. U dačynieńni da jaho ŭžo raspačataja kryminalnaja sprava, piša Gazeta.ru.
«Dzieci hulali pablizu prajeznaj častki, stralajučy z cacačnaha aŭtamata pa mašynach. Adzin z kiroŭcaŭ, razzłavany pavodzinami dziaciej, ździejśniŭ najezd na adnaho z małaletnich, paśla čaho, vyjšaŭšy z mašyny, užyŭ da dziciaci hvałt», — havorycca ŭ paviedamleńni rehijanalnaha ŭpraŭleńnia SK.
Nieŭzabavie ŭ siecivie źjaviłasia videa z kamiery vonkavaha nazirańnia, na jakim zafiksavanyja nieadekvatnyja dziejańni kiroŭcy. Na zapisy vidać, jak dvoje školnikaŭ stajać kala prajeznaj častki i adzin ź ich celicca z cacačnaha aŭtamata va ŭsiedarožnik, jaki jedzie mima. Razabrać, ci robiać dzieci streł u aŭtamabil abo prosta celacca, na videa niemahčyma.
Kiroŭca aŭtamabila pieršapačatkova, miarkujučy pa ŭsim, chacieŭ pavaročvać na skryžavańni naleva, ale rezka tarmozić, razvaročvajecca, vyjazdžaje na abočynu i ciśnie na haz. Chłapčuki puskajucca ŭrassypnuju: adzin uciakaje da padjezda susiedniaha doma, a druhi sprabuje ŭciačy ad usiedarožnika ŭzdoŭž abočyny. Adnak raźjušany kiroŭca dahaniaje školnika i bampieram aŭtamabila vyšturchvaje jaho na prajeznuju častku.
Paśla hetaha aŭtamabilist rezka adkryvaje dźviery, vychodzić z mašyny, idzie da chłopčyku, chapaje jaho za kaptur, padvodzić da aŭtamabila, a zatym ź siłaj šturchaje ŭniz, u vyniku čaho školnik padaje na kaleni. Mužčyna dastaje telefon i vyklikaje palicyju.
Ekipaž padjechaŭ prykładna praz 15 chvilin, uvieś hety čas kiroŭca nie davaŭ chłopcu ŭstać z kaleniaŭ, utrymlivajučy jaho za plačo. Na roliku vidać, jak padychodziać da kiroŭcy piešachody, jakija znachodzilisia pobač. Adnak, pra niešta pahavaryŭšy z kiroŭcam, jany spakojna adpraŭlajucca dalej.
Palicejskija, jakija prybyli na miesca incydentu, narešcie padniali junaha «aŭtamatčyka» z kaleniaŭ, uvažliva ahledzieli mašynu, zatym pasadzili kiroŭcu i chłopčyka ŭ patrulny aŭtamabil. Praź niekatory čas kiroŭcu ŭsiedarožnika adpuścili, i jon źjechaŭ. Chłopčyk ža razam z palicejskimi adpraviŭsia da svajho doma. Tam supracoŭniki palicyi pieradali školnika baćkam, adnak nie paviedamili pra incydent.
Pra toje, što adbyłosia, baćki daviedalisia nie adrazu. Tolki pračytaŭšy ŭsie detali ŭ ŚMI, baćka chłopčyka padaŭ zajavu ŭ palicyju.
Paśla najezdu ŭ školnika dyjahnastavali strasieńnie mozhu i ŭdar levaj skronievaj kostki. Pa niepaćvierdžanaj infarmacyi, paśla razmovy sa śledčym chłopčyk straciŭ prytomnaść i byŭ špitalizavany. Miedyki ličać, što nieprytomnaść źjaŭlajecca nastupstvam strasieńnia mozhu.
Pa fakcie incydentu SK apieratyŭna pravioŭ pravierku i raspačaŭ u dačynieńni da mužčyny kryminalnuju spravu pa č. 1 st. 213 KK RF (Chulihanstva). Padazravanamu pahražaje da piaci hadoŭ pazbaŭleńnia voli.
