Čytačy «Našaj Nivy» dasłali ŭ redakcyju videa svaich pryhodaŭ na Dzień Voli.
Pavodle ich słovaŭ, jany chacieli patrapić dadomu, ale natyknulisia na milicejski kardon, jaki ich nie prapuskaŭ.
Paśla słovaŭ adnaho ź milicyjanieraŭ «Možiet, možno užie? Možiet, odnoho?» paru prapuścili za kardon, dzie adrazu ž skrucili.
Vyzvalili ich z Maskoŭskaha RUUS kala 22-j viečara.
«My adrazu byli na praśpiekcie, kali ludzi źbiralisia. Moj muž pracuje na Kuźmy Čornaha, my ź im pajšli dadomu. Na skryžavańni Čornaha i Surhanava stajali ludzi i ŭ cyvilnym, i milicyja. Nam treba było dadomu — a inšaj darohi nie było, bo prajšła ŭžo viestka, što mietro zakrytaje. Idziom, i hetyja ludzi stajać — jany skazali, što tut nielha iści. Ale nam ža dadomu treba, my kažam — a jak nam prajści dadomu? Čamu ja nie mahu? Tut jany razychodziacca, z-za śpiny vylatajuć niejkija ludzi i prosta chapajuć majho muža. I mianie voś tak (zakručvaje ruku za śpinu). Ja pačała kryčać — schapili niejkija ludzi ŭ čornym, biez apaznavalnych znakaŭ. Muža bili, mianie nie bili, tolki tvaram da ziamli i nie davali hladzieć pa bakach. Nie było takoha momantu, kab nabrać u milicyju ci maci rodnaj. Hetyja ludzi pieradali nas ludziam u formie, tyja zakinuli ŭ MAZ. Tam stajali niejkija ludzi, jany vielmi hruba siabie viali, na ŭsie pytańni jany kazali «zatknisia» — heta samaje miakkaje słova było. Ja takoha abychodžańnia z čałaviekam — saboj u dadzienym vypadku — raniej navat ujavić nie mahła. Paśla pryjechaŭ niejki busik, tam nie było siadzieńniaŭ, nas tudy zapichnuli. Mnie, jak dziaŭčynie, prapanavali miesca. Mužčyny siadzieli na padłozie, na kaleniach — chto jak. Telefony adabrali, na ŭsie pytańni, kudy nas viazuć nam raili ścichnuć, tak by mović. U RUUSie byli ad 14-ci hadzin. Užo tam ničoha asablivaha nie było, tak — supracoŭniki ŭsio chichańki-chachańki z nas rabili. Byŭ u našaj kampanii navat mužyk u tapkach, jaki prosta vyjšaŭ pakuryć z padjezdu. I byŭ chłopiec, jaki pracuje ŭ kramie na Jakuba Kołasa. Jon vyjšaŭ sabie kupić pajeści, a jaho zabrali — krama zastałasia biez supracoŭnika. Było niekalki niećviarozych, tak. Vidać, takich paśla i pakažuć pa BT», — raskazała zatrymanaja Natalla.
