Lidar biełaruskaj apazicyi Mikoła Statkievič raskazaŭ, što byŭ zatrymany 23 sakavika na kvatery svajho siabra pa partyi. Jon pierabraŭsia tudy sa svajoj chaty ŭ spadzievie, što ŭdasca paźbiehnuć zatrymańnia pierad Dniom Voli. Heta była adnapakajoŭka biez ramontu na vulicy Łabanka ŭ rajonie mietro «Kamiennaja Horka».
Z Łošycy da Kamiennaj Horcy jaho vieźli spačatku žonka na mašynie, paśla jon pierasieŭ na mietro, a paśla jaho vioz paźniej zatrymany paplečnik pa partyi Siarhiej Kuncevič.
Jahony paplečnik prynios tudy pradukty i syšoŭ. Praź niejki čas paśla hetaha dźviery pačali admykać — spačatku klučom, toje nie ŭdałosia, tady fomkaj.
Pry zatrymańni z palitykam abychodzilisia karektna. Pakazali paśviedčańni MUS, a advieźli ŭ turmu KDB. Statkievič adznačaje, što vieźli na darahim «Leksusie». «Na «Leksusach», blin, jeździać zatrymoŭvać!» — vostra zreahavaŭ padpałkoŭnik zapasu Statkievič.
Statkieviču paabiacali paviedamić pra aryšt žoncy, ale taho nie zrabili. Bolš za toje, praz try dni paśla zatrymańnia ŭ KDB joj adkazvali, što nie viedajuć, dzie jon.
Statkieviču było vystaŭlenaje padazreńnie ŭ padrychtoŭcy masavych biesparadkaŭ, pryčym ad 2011 hoda, choć jon da 2015-ha znachodziŭsia ŭ źniavoleńni.
U turmie Statkievič admaŭlaŭsia davać pakazańni i navat admaŭlaŭsia pradstaŭlacca. U toj ža čas idučy pa kalidory, jon kožny raz hučna kryčaŭ «Tut Statkievič, dobraj ranicy, terarysty!», kab inšyja źniavolenyja viedali, što jon tut i žyvy.
Statkievič vysoka acaniŭ dziejańni ludziej 25 Sakavika. Na jahonuju dumku, ludzi pakazali svaju hodnaść, niahledziačy na zastrašvańni. Dziakujučy 25-mu, skazaŭ Statkievič, śviet pabačyŭ sutnaść režymu i heta sarvie mahčymaść atrymańnia kredytaŭ, kaža jon. «Paśla padziej 25-ha ŭ piersanała turmy źmianilisia pavodziny, — kaža Statkievič. — Źjaviłasia nijakavataść», — raskazaŭ palityk.
Statkievič vyhladaje ćviordym i ŭpeŭnienym. Jon zaklikaŭ praciahnuć pratesty, u tym liku 1 Maja i 9 Maja. «Projdziem, uskładziem kvietki, sa spadziavańniem, što Biełaruś znoŭ budzie vyzvalenaja».
