27 sakavika ŭ sudzie Kastryčnickaha rajona Viciebska razhledzieli administracyjnyja spravy haradžan, zatrymanych padčas mirnych akcyj pratestu 25 i 26 sakavika, paviedamlajuć «Narodnyja naviny Viciebska».
Žurnalisty, pravaabaroncy i prosta nieabyjakavyja žychary Viciebska pačali źbiracca ŭ faje Kastryčnickaha suda, jak tolki jon adkryŭsia. Adnak da prysutnych vyjšła pamočnica staršyni suda Volha Klimkova i, paviedamiŭšy ab tym, što zatrymanych u vychadnyja pryviazuć tolki da 14:00, zapatrabavała ačyścić budynak suda.
Žurnalisty, pravaabaroncy i nieabyjakavyja žychary Viciebska ŭ faje Kastryčnickaha suda. Fota Siarhieja Sierabro
Sudy nad udzielnikami Dnia Voli i zatrymanymi na płoščy Pieramohi 26 sakavika sapraŭdy pačalisia paśla 14:00. Adrazu skažam, što ŭsie jany byli pryznanyja vinavatymi ŭ pravaparušeńniach, jakija im prypisvalisia milicyjaj.
Pa 15 sutak aryštu atrymali siabra partyi BNF Leanid Aŭtuchoŭ z Haradka, jaki ŭ subotu išoŭ ŭ kałonie pieršym i skandavaŭ łozunhi, pravaabaronca Leanid Śviecik i fryłansier Kanstancin Mardvincaŭ, jakich zatrymali ŭ niadzielu, 26 sakavika, na płoščy Pieramohi.
Pravaabaronca Iryna Traćciakova patrabuje prapuścić jaje na sudovaje pasiadžeńnie pa spravie Kastusia Mardvincava. Fota Siarhieja Sierabro
Na 13 sutak aryštu asudzili 19-hadovaha viciablanina Ułada Kamaroŭskaha, jakoha zatrymali na Dni Voli 25 sakavika. Viciebskaha aktyvista partyi BNF Chrystafora Žalapava, jaki taksama išoŭ na Dni Voli sa ściaham na plačach i vystupaŭ la pomnika Karatkieviča, pakarali 12 sutkami aryštu.
Žurnalist z Oršy Arciom Sizincaŭ, jaki aśviatlaŭ subotniuju akcyju dla radyjo «Racyja» atrymaŭ 10 sutak aryštu. Sud nie pahadziŭsia z tym, što Sizincaŭ vykonvali prafiesijnyja abaviazki žurnalista, i pakaraŭ jaho za ŭdzieł u niesankcyjanavanym mierapryjemstvie. Akramia taho, kanvoj nie dazvoliŭ maładomu čałavieku zabrać z saboj pradukty, jakija jamu pieradali ŭ zale pasiadžeńniaŭ.
Štraf u pamiery 690 rubloŭ atrymała pravaabaronca Iryna Traćciakova, jakuju zatrymali 26 sakavika ŭ rajonie płoščy Pieramohi. Niahledziačy na šmatlikija niestykoŭki ŭ rapartach i pratakołach milicyi, vyjaŭlenych u chodzie pasiadžeńnia zatrymanaj, sudździa pryznała jaje vinavataj.
Taksama byli aštrafavany jašče dźvie dziaŭčyny Alina Silčanka i Hanna Ściapura, kožnyja ź ich pavinny zapłacić u kaznu pa 460 rubloŭ.
