Były daradca prezydenta Trampa ŭ pytańniach nacyjanalnaj biaśpieki Majkł Flin zajaviŭ pra hatoŭnaść dać pakazańni padčas raśśledavańnia rasiejskaha ŭmiašańnia ŭ amerykanskija prezydenckija vybary ŭ abmien na imunitet ad mahčymaha kryminalnaha pieraśledu, paviedamiła hazeta The Wall Street Journal sa spasyłkaj na amerykanskich aficyjnych asobaŭ.
Flin byŭ adpraŭleny ŭ adstaŭku paśla taho, jak vyśvietliłasia, što jon chłusiŭ vice-prezydentu ZŠA Majku Pensu pra svaje sustrečy z rasiejskim ambasadaram u ZŠA. Flin, jaki byŭ daradcam kandydata Trampa padčas prezydenckaj kampanii, pryciahvaje asablivuju ŭvahu krytykaŭ Donalda Trampa praź jahonyja suviazi z Rasiejaj. Majkł Flin, naprykład, braŭ udzieł u cyrymonii śviatkavańnia jubileju telekanału RT, za što atrymaŭ hanarar u niekalki dziasiatkaŭ tysiač dalaraŭ.
Majkł Flin i Uładzimir Pucin na śviatkavańni jubileju telekanała RT ŭ 2015 hodzie.
Jość zdahadki, što jon moh abmiarkoŭvać z rasiejskimi pradstaŭnikami los sankcyjaŭ, uviedzienych suprać rasiejskich kampanijaŭ i pryvatnych asobaŭ, što majuć dačynieńnie da aneksii Rasiejaj Krymu i padtrymki separatystaŭ na ŭschodzie Ŭkrainy. FBR raśśleduje jahonyja dziejańni ŭ ramkach śledztva ab umiašańni Kramla ŭ amerykanski vybarčy praces.
Pavodle źviestak hazety, ni FBR, ni kamitety Kanhresu ŭ spravach vyviedki, jakija viaduć svajo ŭłasnaje raśśledavańnie, nie pryniali pakul prapanovy Majkła Flina.
Advakat Flina Robert Kiełner u svajoj zajavie paćvierdziŭ fakt hatoŭnaści jahonaha klijenta dać pakazańni kamitetam Kanhresu. Advakat adznačyŭ, što Majkł Flin staŭ abjektam «nieabhruntavanych zdahadak» i «aburalnych abvinavačvańniaŭ u zdradzie».
