U Minsku ŭdałosia spynić raspaŭsiudžvańnie barščeŭnika Sasnoŭskaha, paviedamiła siońnia žurnalistam namieśnik staršyni Minskaha haradskoha kamiteta pryrodnych resursaŭ i achovy navakolnaha asiarodździa Natalla Alejnikava, pieradaje BiełTA.
«Płošča, jakaja zaniataja barščeŭnikam, u horadzie nie pavialičvajecca. U 2015 hodzie my detalova abśledavali terytoryi, u kožnaj rajonnaj administracyi byli raspracavanyja płany mierapryjemstvaŭ. Usim ziemlekarystalnikam vydadzienyja pradpisańni, dzie ŭkazana na nieabchodnaść nie dapuskać rostu raśliny bolš čym na 0,5 mietra i jaho ćvicieńnia. U vypadku nievykanańnia patrabavańniaŭ pryciahvajem pradpryjemstva da adkaznaści», — adznačyła Natalla Alejnikava.
Bolš za ŭsio barščeŭnik raspaŭsiudžany na terytoryi Leninskaha i Kastryčnickaha rajonaŭ. U tych rajonach horada, dzie płošča raspaŭsiudžvańnia składaje mienš za 1 ha, pastaŭlenaja zadača pazbavicca ad invaziŭnaj raśliny da kanca biahučaha hoda.
Barščeŭnik Sasnoŭskaha — bujnaja šmathadovaja raślina, jakaja ćvicie adzin raz ź lipienia pa žnivień. U siarednim adna raślina pradukuje kala 20 tysiač ziarniat nasieńnia, asobnyja adzinki — bolš za 100 tysiač. Barščeŭnik ujaŭlaje pahrozu zdaroŭju ludziej, bo sudotyk ź jaho ściebłami, liściem i kvietkami pryvodzić da źjaŭleńnia na skury apiokaŭ. Akramia taho, jon vyklikaje ekałahičnyja prablemy: z-za chutkaha raźvićcia papulacyj vyciaśniaje inšyja raśliny i zachoŭvaje daminujučuju pazicyju na zachoplenych terytoryjach.
Pra barščeŭnik i inšyja invaziŭnyja vidy čytajcie tut: Nie mieła baba kłopatu — zaviała kraba: top-5 pierasialeńniaŭ pradstaŭnikoŭ fłory i faŭny
