Śledčyja raspačali kryminalnuju spravu ŭ dačynieńni da 33-hadovaj žančyny ź Pinska, jakaja padazrajecca ŭ niezakonnym pazbaŭleńni voli treciakłaśnika.
15 maja paciarpieły razam ź siabram išoŭ u himnaziju. Pa darozie vyrašyli zajści da adnakłaśnika. U padjeździe da chłopcaŭ padyšła nieviadomaja žančyna i siłaj zaciahnuła adnaho ź ich u svaju kvateru. Žančyna ŭtrymlivała chłopčyka kala 30 chvilin, z 13.00 da 13.30, i nie davała jamu syści.
«Pry hetym jana, vykazvajučy ŭ adras školnika roznyja pahrozy, naniesła jamu niekalki udaraŭ nažom pa roznych častkach cieła», - paviedamiła aficyjny pradstaŭnik upraŭleńnia Śledčaha kamiteta pa Bresckaj vobłaści Maryna Drańkova.
Siabar paciarpiełaha raspavioŭ pra ŭsio jaho baćkam, a tyja źviarnulisia ŭ milicyju. Paśla taho, jak pravaachoŭniki vyzvalili chłopčyka, jaho pavieźli ŭ balnicu z množnymi paviarchoŭnymi ranami i ranami ŭ vobłaści tvaru, cieła i ruk. Paśla akazańnia pieršaj miedycynskaj dapamohi jaho adpuścili dadomu.
U dačynieńni da žančyny śledčyja raspačali kryminalnuju spravu pa č. 2 art. 183 KK. Sankcyja artykuła praduhledžvaje ad 5 da 8 hadoŭ pazbaŭleńnia voli.
