U Miadzielskim rajonie 23-hadovy traktaryst i 13-hadovaja školnica pakachali adno adnaho. Za seks ź niepaŭnaletniaj mužčyna adkaža pa kryminalnym artykule.
Miadzielski rajonny adździeł Śledčaha kamiteta raspačaŭ suprać maładoha čałavieka kryminalnuju spravu za seksualnyja adnosiny z vaśmikłaśnicaj.
Namieśnik načalnika Miadzielskaha RASK Michaił Sakałdynski raspavioŭ Kraj.baj:
— Dziaŭčyncy ciapier 14 hadoŭ. Pra jaje stasunki z abvinavačanym stała viadoma ŭ hetym miesiacy, kali jana prychodziła na pryjom da hiniekołaha. U doktara vyśvietliłasia, što niepaŭnaletniaja žyvie pałavym žyćciom. Dziaŭčyncy daviałosia pryznacca doktaru, maci i supracoŭnikam milicyi, kali i pry jakich abstavinach jana straciła cnotu.
Historyja adbyłasia ŭletku minułaha hoda ŭ adnoj ź viosak Miadzielskaha rajona. Na toj momant 13-hadovaja školnica tolki pierajšła ŭ vośmy kłas.
Pa słovach Michaiła Sakałdynskaha, žyła dziaŭčynka ŭ Miadzieli z maci ŭ nieščaślivaj siamji. Stajała na ŭliku ŭ inśpiekcyi i kamisii pa spravach niepaŭnaletnich za ŭžyvańnie śpirtnych napojaŭ.
Baćki ŭ razvodzie, i na letnija vakacyi školnica adpraviłasia ŭ viosku da baćki. Tam i paznajomiłasia z 23-hadovym traktarystam miascovaha sielskahaspadarčaha pradpryjemstva.
Małady mužčyna i dziaŭčynka pasiabravali, kožny dzień pravodzili razam. Jon na pracy kataŭ siabroŭku na traktary.
Niejak traktaryst i školnica pryjechali na fiermu pa vadu. Tut siabroŭskija adnosiny pierajšli ŭ inšuju płoskaść. Zakachanyja damovilisia nikomu pra heta nie raspaviadać. I tajamnica zachoŭvałasia na praciahu hoda, da vizitu dziaŭčynki da hiniekołaha.
— Mužčyna pryznaje svaju vinu, — raspaviadaje Michaił Sakałdynski. — Kaža, što viedaŭ pra toje, što jaho siabroŭka nie dasiahnuła 16-hadovaha ŭzrostu, ale ž u ich kachańnie. I, potym, jany spadziavalisia, što hetaja suviaź zastaniecca ich tajamnicaj.
Dziaŭčynka i jaje baćki da abvinavačanaha nie majuć nijakich pretenzij i zajavu na jaho pisać admovilisia.
Ale zajavy ad paciarpiełaj śledstvu pa hetym artykule i nie treba. Mužčyna ŭ kožnym razie adkaža pierad zakonam.
Sprava zaviedzienaja pa pieršaj častcy artykuła 168 Kryminalnaha kodeksa Respubliki Biełaruś «Pałavyja znosiny, učynieny asobaj, jakaja dasiahnuła vasiemnaccacihadovaha ŭzrostu, z asobaj, jakaja zaviedama nie dasiahnuła šasnaccacihadovaha ŭzrostu».
Złačynstva karajecca abmiežavańniem voli na termin da čatyroch hadoŭ abo pazbaŭleńniem voli na toj ža termin sa štrafam.
Miera strymańnia ŭ dačynieńni da abvinavačanaha nie abirałasia. Da suda jon budzie znachodzicca na svabodzie.
