«Cikavy muziej» raźmieščany na vulicy Zamkavaj. Tut sabrany pradmiety ŭžytku minułych stahodździaŭ. U dvuch nievialikich pamiaškańniach, jak śćviardžaje adzin z uładalnikaŭ — hrodzienski kalekcyjanier Aleh Jorš, sabrana bolš za 600 ekspanataŭ. Muziej voś-voś adkryjecca, a dla partała tut.by praviali pieršuju ekskursiju pa załach.
Fota: Volha Kamiahina, TUT.BY
U muziei niekalki ekspazicyj — adna zała addadziena pad kalekcyju prasaŭ. Jany pierajechali siudy z «Muzieja prasa», što znachodzicca na vulicy Savieckaj. Kalekcyja ŭnikalnaja i samaja vialikaja ŭ Biełarusi. U apošni čas jaje papoŭnili novyja ekspanaty. Naprykład, pras dla bializny, bolš padobny na mieč, ci maleńki pras dla kapielušoŭ i jaho minijaciurny sabrat dla prasavańnia maleńkich składak.
Da prasaŭ dadalisia i inšyja ekspanaty. Tak, tut jość kutok fotatechniki i radyjokropak, prajhravalnikaŭ, cyrulnych pryładaŭ i kuchonnaha načyńnia. A ŭ kalidory pierad uvachodam u muziej uładalniki arhanizujuć instalacyju, jakaja budzie čas ad času mianiacca.
Aleh kaža, što muziej budzie dapaŭniacca cikavymi ekspanatami, a pakul raspaviadaje pra niekatoryja rečy, jakija možna ŭbačyć u nievialikim muziejčyku. Naprykład, pra telefonnuju budku, jakaja ŭ 60-ch hadach minułaha stahodździa stajała na adnoj z hrodzienskich vulic. Pobač — kalekcyja chatnich telefonaŭ.
— Dla maładoha pakaleńnia dyskavyja telefony — redkaść, — kaža ŭładalnik muzieja.
Darečy, u muziei možna ŭsio macać rukami, fatahrafavacca z ekspanatami, a ŭładalniki praviaduć ekskursiju.
— Ekspazicyja nievialikaja, chopić i 20 chvilin na naviedvańnie našaha muzieja. Ale, dumaju, naviedvalniki buduć zastavacca na daŭžej, bo pra kožny ekspanat možna doŭha raspaviadać.
— Choć muziej i maleńki, ale uražańniaŭ ad jaho zastaniecca šmat, — kaža Aleh i dadaje, što horadu ź jaho turystyčnym patencyjałam takich ustanoŭ treba našmat bolš, tamu što z uviadzieńniem biaźvizavaha ŭjezdu turystaŭ u Hrodnie stała bolš, a zabavak nie dadałosia.
Muziej, pa słovach Aleha, naŭrad ci budzie prynosić vialiki prybytak, ale ŭsio-tki ŭładalnik spadziajecca na toje, što ŭ chutkaj budučyni ekspazicyja stanie papularnaj.
«Cikavy muziej» aficyjna adkryjecca 10 žniŭnia.
