Napadu padvierhłasia 56-hadovaja žycharka Viciebska, jakaja 2 lipienia viartałasia dadomu na 10-ju Połackuju vulicu paśla viečarovaj źmieny, paviedamlajuć Narodnyja naviny Viciebska.
Kali prykładna a 23:45 žančyna vyjšła z tramvaja na prypynku «Himnazija №4» i zbočyła na svaju vulicu, jana pačuła, jak niechta zzadu biažyć za joj. Mužčyna, jaki padbieh, nanios achviary ŭdar zzadu pa hałavie i pasprabavaŭ vychapić torbu.
Žančyna torbu nie addała, i rabaŭnik nanios joj vostrym pradmietam niekalki parezaŭ ruk, a taksama biŭ pa hałavie i tułavie. Žančyna niahledziačy na ŭdary akazała napadniku aktyŭny supraciŭ: raspyliła jamu ŭ tvar piarcovy bałončyk, a kali mužčyna prycisnuŭ jaje ruku z bałončykam da ziamli — ukusiła za kalena.
Usio ž złamyśniku ŭdałosia vyrvać u achviary sumku, i jon pabieh pa vulicy Supruna ŭ bok Leninhradskaj. Pa darozie vykidvaŭ z sumki rečy.
Na nastupny dzień hetuju sumku i častku źmieściva pabačyła na terytoryi chrama śviatoj Jeŭfrasińni Połackaj na Leninhradskaj vulicy adna z prychadžanak. A niedaloka ad carkvy śledčyja znajšli bajku čornaha koleru z nadpisam «Adidas» z kapiušonam i biejsbołku bardovaha koleru ź biełym łahatypam «Nike», što naležyli mierkavana rabaŭniku.
Viciebski haradski adździeł Śledčaha kamiteta raspačaŭ pa fakcie rabavańnia kryminalnuju spravu
Napadnika šukajuć, jaho prykmiety: uzrost kala 35 hadoŭ, rost 170-175 santymietraŭ, chudarlavaha ciełaskładu, byŭ apranuty ŭ vopratku značna bolšaha pamieru — bajku z kapiušonam, spartyŭnyja štany ciomnaha koleru, jak miarkujecca, z tkaniny flis.
Imavierna, hety mužčyna byŭ zafiksavany kamierami nazirańnia ŭ kramie «Jeŭraopt» pa vulicy Citova a 21:45. Kali vy paznali mužčynu na fota, ci vam viadoma niešta pra rabavańnie, śledčyja źviartajucca z prośbaj paviedamić infarmacyju ŭ Viciebski haradski adździeł Śledčaha kamiteta pa adrasie: horad Viciebsk, pr-t Maskoŭski, 51 a ci patelefanavać pa telefonie dziažurnaj častki 80212 486637 abo 102
