Va ŭźbiekskim horadzie Charezm u noč z 26 na 27 žniŭnia ŭ ramkach mierapryjemstva «Tun» («Noč») byli zatrymanyja 3706 čałaviek za toje, što jany «biazmetna hulali» pa vulicy ŭ načny čas sutak. U mierapryjemstvie pa zatrymańni prymali ŭdzieł milicyja, supracoŭniki prakuratury, sudoŭ i pradstaŭniki miascovaj administracyi, paviedamlaje miascovaje adździaleńnie «Radyjo Svaboda».
Vyraz «biazmetna hulali» pryvodzicca ŭ aficyjnym paviedamleńni abłasnoha ŭpraŭleńnia MUS. Zatrymańni ludziej pačalisia 26 žniŭnia paśla dzieviaci viečara. Pa słovach supracoŭnika pres-słužby MUS Uźbiekistana, vialikaja častka zatrymanych była aryštavanaja na sutki, i adpuščanaja paśla pryciahnieńnia da štrafu ŭ jakaści pravaparušalnikaŭ. Z astatnimi byli praviedzienyja prafiłaktyčnyja hutarki.
Adnak supracoŭnik pres-słužby MUS nie zmoh udakładnić, na padstavie jakoha pravaparušeńnia hramadzianie byli pryciahnutyja da administracyjnaha štrafu.
«Zhodna z zakanadaŭstvam Uźbiekistana, «biazmetnaje vuličnaje hulańnie» nie ličycca złačynstvam abo pravaparušeńniem. Kali tolki ŭ krainie nie pačałasia vajna, i nie było abvieščanaje nadzvyčajnaje stanovišča abo kamiendanckaja hadzina. Luby hramadzianin maje prava ŭ luby čas sutak špacyravać pa horadzie ź jakoj-niebudź metaj abo biazmetna», — skazaŭ u kamientary vydańniu adzin z uźbiekskich advakataŭ na ŭmovach ananimnaści.
Va UUS Charezmskaj vobłaści taksama nie zmahli rastłumačyć, jaki mienavita zakon Uźbiekistana zabaraniaje hramadzianam krainy «biazmetna hulać u načny čas sutak». Pry hetym tam adznačyli, što «dobryja ludzi nie chodziać pa vulicy ŭ načny čas».
Tym nie mienš, u MUS pryznali, što supracoŭniki charezmskaj milicyi pieravysili svaje paŭnamoctvy i parušyli pravy hramadzian. Tam zajavili, što charezmskaja milicyja pamyliłasia.
«Ja spadziajusia, što ŭ budučyni supracoŭniki UUS Charezmskaj vobłaści nie buduć dapuskać takija pamyłki. Ale ź inšaha boku, u tuju noč byli zatrymanyja čatyry čałavieki, jakija znachodzilisia ŭ vyšuku», — paviedamiŭ pradstaŭnik MUS Uźbiekistana.
