Amierykanskija navukoŭcy raspracavali antycieły, jakija zabivajuć da 99% štamaŭ VIČ i zdolnyja źniščyć infiekcyju na rańniaj stadyi. Złučeńnie zdolnaje atakavać try klučavyja kampanienty virusa, paviedamlaje VVS.
Science Photo Library
Aŭtarami raspracoŭki stali Nacyjanalnyja instytuty achovy zdaroŭja ZŠA i farmaceŭtyčnaja kampanija Sanofi.
Mižnarodnaja supolnaść pa baraćbie ź VIČ (IAS) nazvała raspracoŭku navukoŭcaŭ «cikavym praryvam».
Kliničnyja vyprabavańni rečyva płanujecca pačać u 2018 hodzie.
Ciapier navukoŭcy sprabujuć pieramahčy VIČ, vykarystoŭvajučy tak zvanyja šyroka niejtralizujučyja antycieły, jakija zdolnyja zabivać značnuju častku štamaŭ virusa i praduchilać zaražeńnie.
Novaja raspracoŭka navukoŭcaŭ, pradstaŭlenaja ŭ navukovym časopisie Science, abjadnoŭvaje try typy takich antyciełaŭ u mahutnaje rečyva trajnoha dziejańnia.
«Jany [novyja antycieły] bolš mahutnyja i akazvajuć bolš šyrokaje dziejańnie, čym luboje asobna ŭziataje naturalnaje antycieła ź viadomych na siońniašni dzień», — kaža adzin z aŭtaraŭ daśledavańnia Hery Niejbieł.
Samyja mahutnyja pryrodnyja antycieły zdolnyja pieramahčy da 90% štamaŭ VIČ.
«My dasiahnuli achopu ŭ 99%, i jon dasiahajecca pry vielmi nizkaj kancentracyi antycieła», — adznačaje Niejbł.
U vyniku vopytaŭ na 24 małpach ni ŭ adnoj z žyvioł nie źjaviłasia infiekcyja paśla ŭviadzieńnia im virusa VIČ.
Kiraŭnik Mižnarodnaj supolnaści pa baraćbie ź VIČ Linda Hiejł Biekier adznačaje, što vobłaść prymianieńnia novych antyciełaŭ moža być značna šyrejšaja, čym možna ŭjavić siońnia.
«Siońnia jašče raniaja stadyja, i ja jak navukoviec ź nieciarpieńniem čakaju pieršych vyprabavańniaŭ, jakija pavinny pačacca u 2018 hodzie», — kaža Biekier.
Kiraŭnik Nacyjanalnaha instytuta ZŠA pa vyvučeńni alerhičnych i infiekcyjnych zachvorvańniaŭ Entani Faučy nazvaŭ adkryćcio intryhujučym.
«Kambinacyja antyciełaŭ, kožnaje ź jakich źviazanaje z roznymi bakami VIČ, lepš za ŭsio zdolnaja pieraadoleć achoŭnuju reakcyju virusa i dasiahnuć efiektyŭnaha ŭzroŭniu lačeńnia i prafiłaktyki», — adznačaje navukoviec.
Virus VIČ vałodaje vysokaj zdolnaściu da mutacyi, i imunnaj sistemie čałavieka składana adnačasova zmahacca z roznymi vidami štamaŭ.